Topi: Meta po punon për një proces të maturuar
Ish- Presidenti i Republikës, Bamir Topi, tha dje për gazetën “Panorama”, se konsultimet e kreut të shtetit Ilir Meta, në lidhje me negociatat për kufirin detar me Greqinë, bëhen për ta maturuar këtë proces dhe për t’i hequr hijen e paragjykimeve. “Natyrisht, ishte një takim normal dhe besoj në praktikën më të mirë të konsultimeve, praktikë e institucioneve botërore, kur Presidenti konsultohet me paraardhësit, por dhe me njerëz ekspertë që involvohen në një proces të tillë, para se të marrë vendimin. Është një proces jo thjesht formal, prandaj dhe konsultohet, për ta bërë procesin sa më të maturuar dhe në funksion të heqjes së paragjykimeve që kanë këto procese. Biseduam rreth pikave më të rëndësishme që përfshijnë këto negociata, por bisedimet kanë karakter konfidencial”, tha Topi. Duket se në takimin me kreun e shtetit, ish- Presidenti Topi ka sugjeruar që në procesin e monitorimit të negociatave me Greqinë të përfshihen dhe komisionet parlamentare, ai për punët e Jashtme dhe i Sigurisë.
“Presidenti, dhënien e plotfuqishmërisë nuk e ka një akt thjesht formal. Kjo hallkë është vendosur në Kushtetutë sepse grupi negociator nuk mund të shkojë mbi bazën e strukturës, që në negociata merr pjesë një punonjës i Ministrisë së Mbrojtjes, apo Ministrisë së Brendshme e kështu me radhë. Jo! Nevojitet një listë nominale sepse Presidenti ka instrumentet institucionale të supervizionit, cili është profili i negociatorëve, cila është pjesa e kredibilitetit për këtë proces dhe në fund, pasi bindet për këtë ekip, bën dhënien zyrtare të plotfuqisë së tij. Që nga ky moment, grupi negociator është i lirë të veprojë brenda kornizave dhe termave të referencës. Unë kam sugjeruar dhe besoj se të njëjtin mendim kishin dhe presidentët e tjerë të nderuar, se duhet patjetër hap pas hapi të futet të lojë detyrimisht Komisioni Parlamentar për politikën e Jashtme dhe i Sigurisë Kombëtare. Kjo e bën procesin më të monitorueshëm dhe të kontrollueshëm sepse marrëveshja lidhet me çështjen e sovranitetit të vendit dhe për të eliminuar çdo lloj paragjykimi që ka në publik”, tha Topi.