Takimi në Lezhë: Batërdi me pronat në bregdet, përgjegjësit para ligjit

LEZHE- Ministri i Brendshëm Xhafaj u ndalua dje në Lezhë ku prezantoi kreun e policisë së këtij qarku, Ferdinand Mara. Por gjatë fjalës së tij, ministri ka shprehur shqetësimin në lidhje me abuzimet e kryera me pronat në bregdet, ku, sipas tij, personat përgjegjës janë në hetim. Ai është pyetur për faktin se ka paralajmëruar arrestime. "Do të goditen të gjitha grupet kriminale. Do godasim asetet e grupeve kriminale. Unë nuk paralajmëroj arrestime. Jam ministri i Punëve të Brendshme që drejtoj, për sa mua më takon, orientoj, drejtoj Policinë. I takon strukturave të Policisë, pasandaj strukturave të Prokurorisë, që të marrin masa të duhura intensive që janë duke u zhvilluar për grupet kriminale, por edhe abuzimet me pronën publike. Jam i shqetësuar për disa abuzime që janë bërë me tokat këtu, me vijën bregdetare në zonën e Lezhës posaçërisht. Hetimet që janë duke u zhvilluar, janë në proces, do të jenë të suksesshme. Besoj fort që shkaktarët e kësaj batërdie do të vendosen para ligjit. Krimet e marra për frymë për banorë në Lezhë, nuk e rendisin këtë qytet si qark pozitiv. Duhet ta bëjmë dallimin qartë. Pritshmëria është më e lartë", tha Xhafaj. Sipas tij, një prioritet i rëndësishëm është lufta ndaj krimit të organizuar dhe grupeve kriminale dhe ky duhet të jetë një prioritet i strukturave vendore të Policisë edhe në Lezhë, kryesisht strukturave të policisë kriminale. "Ka një punë të mirë të nisur për identifikimin e grupeve kriminale, përbërjes dhe aseteve të krijuara nga aktiviteti i këtyre grupeve në Lezhë dhe jashtë vendit dhe këtu nuk kam parasysh vetëm Bashkinë e Lezhës, por posaçërisht grupet nga Kurbini dhe të tjera në Mirditë dhe ky do të jetë fokusi kryesor për t'i goditur fort dhe për t'u prerë atyre lidhjet dhe asetet ekonomike që kanë vendosur apo që i kanë si mjet dhe instrument për të ushtruar veprimtari kriminale", tha më tej ministri Xhafaj.