Demarkacioni, Meta negocioi për marrëveshjen, Rama: Konflikti shpikje e politikës
Zbardhen takimet sekrete të Metës me Markoviç, në dijeni ishin Kryeministri dhe Limaj. Rama sqaron “përplasjen” me Haradinajn
Marrëveshja e demarkacionit mes Kosovës dhe Malit të Zi, sipas zëvendëskryeministrit të Kosovës, Fatmir Limaj, është arritur dhe falë ndihmës së Presidentit të Republikës, Ilir Meta.
Këtë deklaratë, dje, Fatmir Limaj e ka bërë në një prononcim për mediet kosovare, ku ndër të tjera ka folur dhe për 10- vjetorin e pavarësisë së këtij shteti. Zëvendëskryeministri Kosovës ka thënë se presidenti shqiptar ka qenë i përfshirë në procesin e ndërmjetësimit me presidentin e Malit të Zi, Dusko Markoviç, proces që u finalizua me një dokument konkret, i cili u prezantua dje gjatë 10- vjetorit të Pavarësisë së Kosovës. Mediet kosovare kanë raportuar se Presidenti Meta është takuar më 9 shkurt me kreun e qeverisë së Malit të Zi, Markoviç, me të cilin ka biseduar për gjetjen e një zgjidhjeje për procesin e demarkacionit, një ndër pikat që mbante peng lëvizjen e lirë të qytetarëve të Kosovës. Takimi mes Metës dhe Markoviçit është zhvilluar një javë më parë në Podgoricë. “Të premten e shkuar, datë 9 shkurt, Presidenti Meta ka qenë në një dreke informale në Podgoricë në ‘ Villa Gorica’ me Kryeministrin e Malit të Zi dhe ka negociuar formulën përfundimtare për demarkacionin para vizitës së Kryeministrit të Malit të Zi në Kosovë. Në dijeni të këtyre negociatave sekrete ka qenë zëvendëskryeministri Limaj dhe Kryeministri Haradinaj”, kanë thënë burimet e gazetës “Epoka e re”.
KONFLIKTI
Por demarkacioni me Malin e Zi shkaktoi një konflikt në distancë mes Kryeministrit Edi Rama dhe kreut të shtetit të Kosovës, Ramush Haradinaj. Kryeministri shqiptar ishte dje i ftuar në studion e Baton Haxhiut në “Klan Kosova’, teksa tha se çështja e demarkacionit ishte një problem i shpikur nga politika e brendshme e Kosovës. “Demarkacioni është një problem i shpikur, është një problem i shpikur nga politika e brendshme e Kosovës, që nuk ka asnjë bazë reale”, u shpreh Rama. Por kjo deklaratë nuk ka kaluar në heshtje dhe është shoqëruar me një mesazh të fortë nga Kryeministri Haradinaj, i cili me një mesazh në “Facebook” i ka kërkuar Ramës të merret me shpikjet e veta dhe të mos flasë për politikën e Kosovës. “Urime Pavarësia e Kosovës të gjithë shqiptarëve. Edi Rama nuk ka çfarë të flasë për shpikjet politike në Kosovë! Le të merret me shpikjet e veta brenda Shqipërisë se i dalin boll”, ka thënë të premten Haradinaj. Por pas kësaj për- plasjeje në distancë, në ditën e 10- vjetorit të Pavarësisë së Kosovës, Edi Rama ka shkuar personalisht në shtëpinë e Kryeministrit Haradinaj, me të cilin më pas ka postuar një foto duke trokitur gotat. “Përplasje gotash në shtëpinë e Haradinajve”, shkruhet në postimin e Ramës, i publikuar pas deklaratave në “Klan Kosova”. I pyetur sot nga “Top Channel” rreth përplasjes me Kryeministrin Haradinaj, Edi Rama tha se “Jo më kot e kishim lënë darkën pas emisionit dhe nuk kishte asgjë për të sqaruar. Unë kam bindjen time, ai të vetën, nuk ka asnjë problem. Unë uroj shumë që Ramushi do të bëjë gjënë e duhur dhe me kaq mbaron”, tha Rama.
DEMARKACIONI
Kryeministri Rama, duke folur për çështjen e demarkacionit, ka thënë se dje se kjo çështje duhet të zgjidhet sa më parë me një votë në Parlament. “Unë jam shpresë- plotë që janë momentet e fundit të ngërçit dhe uroj shumë që shpresat të realizohen me një votë ratifikimi në Kuvend për ta çliruar përfundimisht Kosovën nga pengesa e tmerrshme e pamundësisë për të lëvizur lirisht qytetarët e saj”, ka thënë Kryeministri Rama për TCH. Ndërsa presidenti Meta, në një mesazh urimi për 10- vjetorin e Pavarësisë së Kosovës, ka garantuar mbështetjen e institucioneve të Shqipërisë. “Unë si President i Republikës, por edhe të gjitha institucionet e Shqipërisë do të jemi gjithmonë mbështetës e përkrah në ndërmarrjet tuaja të guximshme që fuqizojnë institucionet, demokracinë dhe sundimin e ligjit në Kosovë, që konsolidojnë harmoninë e bashkëjetesës gjithëpërfshirëse dhe që thellojnë bashkëpunimin ndërkombëtar të Kosovës me miqtë dhe organizatat shumëpalëshe”, thuhet në mesazhin e Metës.