Bakojanis akuza Kotzias: Po falni detin

“Qeveria në bisedime të fshehta po anullon marrëveshjen e 2009”

Kërkesa për transparencë në negociatat, që po zhvillohen për marrëveshjen e re mes Shqipërisë dhe Greqisë, kanë filluar të ndjehen edhe në Parlamentin grek. Ish- ministrja e Jashtme greke, Dora Bakojanis, që nënshkroi marrëveshjen e detit me qeverinë shqiptare në vitin 2009, ka kërkuar një interpelancë me ministrin e Jashtëm të Greqisë, Nikos Kotzias, për marrëveshjen e re me Shqipërinë. Përfaqësuesit e qeverisë greke, akuzohen nga opozita, njësoj si në Shqipëri, për mungesën e transparencës për negociatat që janë zhvilluar deri tani për marrëveshjen e re. Si përfaqësuese e opozitës, deputetja konservatore Bakojanis akuzon qeverinë e Kryeministrit Tsipras se po zhvillon bisedime sekrete për të rishikuar marrëveshjen për delimitimin e zonave detare, duke hequr dorë nga kuadri që u arrit në vitin 2009. Në letrën e saj, ishministrja e Jashtme greke thekson se “komuniteti shkencor ndërkombëtar në atë kohë kishte konkluduar se marrëveshja ishte e ekuilibruar dhe me dobi reciproke. “Sipas asaj që raportohet nga shtypi grek dhe shqiptar, qeveria ka hyrë në bisedime të fshehta me Shqipërinë për ta rishikuar marrëveshjen e delimitimit të zonave detare, të nënshkruar nga qeveritë e dy vendeve në vitin 2009, çka kënaq kërkesat shqiptare. Qeveria Tsipras duket e gatshme ta rishikojë marrëveshjen duke shfuqizuar kornizën e përcaktuar më 2009- n. Duhet theksuar se komuniteti shkencor ndërkombëtar asokohe kishte deklaruar se ishte një marrëveshje e balancuar dhe reciproke”, thuhet në shkresën për interpelancë që Bakojanis ka kërkuar me ministrin e Jashtëm grek Kotzias. Tri kanë qenë çështjet që ish- ministrja greke kërkon shpjegime nga qeveria e saj. Sipas Bakojanis, qeveria e Tsipras duhet të sqarojë arsyet e rishikimit të marrëveshjes së detit me Shqipërinë, cilat pika do të rishikohen dhe a do të ndryshojë qëndrimi për delimitimin e zonave bazë. “Kërkojmë shpjegime nga qeveria: 1. Për ç’arsye qeveria po avancon në rishikimin e marrëveshjes së vitit 2009, që ishte nënshkruar edhe nga Greqia, edhe nga Shqipëria? 2. Cilat janë saktësisht pikat e marrëveshjes që ka ndërmend të rishikojë? 3. A është e vërtetë që qeveria do të ndryshojë qëndrimin konstant grek për delimitimin e zonave detyre në bazë të parimit të vijës së mesme?”, thuhet në kërkesën e përfaqësueses së opozitës greke. Bakojanis ka akuzuar qeverinë se po menaxhon me mangësi dhe papërgjegjshmëri një çështje të rëndësishme kombëtare. “Pa konsensusin e nevojshëm me forcat politike të vendit, është e gatshme të pranojë anulimin e marrëveshjes së vitit 2009. Me tekstin e mëparshëm, Greqia rregullonte jo vetëm zonat detare ekzistuese, por paraprinte edhe rreziqet e mundshme”, ka deklaruar Bakojanis.