Shpërthen mina, plagosen pesë minatorë

Tre prej tyre në gjendje të rëndë, dërgohen në Tiranë

BURREL - Pesë minatorë mbetën të plagosur, tre prej të cilëve në gjendje kritike për jetën, gjatë mesnatës në tunelin e traverbangut të Klosit. Shkak për ngjarjen e rëndë është bërë shpërthimi i një mine, që kishte mbetur e paplasur gjatë turnit të dytë. Minatorët janë paraqitur në urgjencë rreth orës 01: 00 të së enjtes, ku pas ndihmës së parë, mjekët kanë vendosur për dërgimin e tyre drejt Spitalit të Traumës. Ndërkohë që Policia është vënë në lëvizje për hetimin e ngjarjes. Mësohet se të parët që ranë në kontakt me lëndën shpërthyese kanë qenë minatorët Ramazan Skordha, 57 vjeç dhe Qazim Likmeta, 49 vjeç, të cilët janë paraqitur në urgjencë në gjendje të rëndë. Ndërsa të plagosur mbetën dhe tre minatorët e tjerë, Shpëtim Liçi, 32 vjeç, Bledar Hoxha, 28 vjeç dhe Klodian Mzhika, 31 vjeç. Ngjarja ndodhi në kilometrin e shtatë të traverbangut, aty ku po kryhen punime nëntokësore për përfundimin e traverbangut të Klosit. Nga hetimet e para besohet se, turni i dytë ka kryer shpërthim brenda në galeri me qëllim avancimin e tunelit, por dyshohet se një prej minave të përdorura të ketë mbetur e pashpërthyer. Mjekët shprehën se minatorët kanë mbërritur në qendrën shëndetësore me probleme të ndryshme, ku disa prej tyre me gjymtyrë të thyera. Grupit hetimor të Policisë dhe Prokurorisë i janë bashkuar mëngjesin e djeshëm ekspertët e Repartit të Inspektim- Shpëtimit të Minierave. Mësohet se është sekuestruar dokumentacioni i trajnimit teknik të minatorëve si dhe procedurat e ndjekura gjatë shpërthimeve nëntokësore. a. l.