Vendimi i Qeverisë, kush refuzon të punojë i hiqet ndihma ekonomike
RAMA: PERSONA 25- 45 VJEÇ QE NUK PRANOJNE TE PUNOJNE
Kryetari i Partisë Demokratike, Lulzim Basha e cilësoi mashtrim deklaratën e Kryeministrit Rama, sipas të cilit, qytetarët refuzojnë të punësohen me 400 mijë lekë në fabrika sepse duan të përfitojnë ndihmën ekonomike prej 50 mijë lekësh dhe të rrinë në shtëpi. “A ka njeri që e beson mashtrimin e Ramës sot nga Berati, se njerëzit preferojnë të marrin 50 mijë lekë ndihmë ekonomike në vend që të punësohen me rroga 400 mijë lekëshe??? Realiteti flet vetë me gojën e këtyre banorëve të Beratit, aty ku banda qeveritare po harxhon sot e nesër miliona lekë për ekskursionin e fundjavës, por asnjë kacidhe për njerëzit në nevojë ekstreme”, shkruan Basha në “Facebook” si reagim ndaj Kryeministrit Rama. Edhe të enjten në Kuvend, debati mes kreut të opozitës dhe Kryeministrit Rama u fokusua te përjashtimi i një numri të madh qytetarësh nga ndihma ekonomike. “Sot, Rama tregoi që është njeri i pandjeshëm, asnjë dhembshuri për qytetarët që sot gjenden me sytë nga qielli, me prindër e fëmijë më barkun bosh. Ky është një realitet që është 1 km nga ky vend që ndodhemi sot, imagjinoni në fshatrat e tjera të Shqipërisë. Rama e ka faktuar, dhe e faktoi dhe sot, që zgjedh të anatemojë opozitën që të fshehë të vërtetën se është autori i braktisjes së këtyre familjeve. Natyrisht që kush ka abuzuar, nuk meriton ndihmë, por kjo është një alibi e Ramës. Ne do luftojmë me të gjitha mjetet e format që kjo emergjencë kombëtare të marrë fund. Kujt i është hequr ndihma, ta përfitojë atë. Vendi ka nevojë që ekonomia të çlirohet nga oligarkët e Ramës”, u shpreh Basha pas seancës parlamentare, ndërkohë që PD ka kërkuar seancë me debat me Kryeministrin në Kuvend.