“Tahiri”, Prokuroria kërkon marrjen në pyetje të Seitit
Seiti u ekstradua në janar në Itali, nuk u pyet në Shqipëri
Prokuroria e Krimeve të Rënda ka dërguar një letërporosi në adresë të autoriteteve të drejtësisë italiane, për të marrë në pyetje Nezar Seitin, i konsideruar si “financieri” i grupit të Moisi Habilajt.
Seiti u ekstradua në janar në Itali, në një kohë që ndaj tij kishte procedim te Krimet e Rënda. Edhe pse qëndroi më shumë se tre muaj në burg në Shqipëri, prokurorët e Krimeve të Rënda nuk arritën ta merrnin asnjëherë në pyetje Seitin. Dosja e tij i ishte bashkuar asaj të ish- ministrit të Brendshëm, Saimir Tahiri, që po hetohet për “trafik narkotikësh” dhe “korrupsion” nga Prokuroria e Krimeve të Rënda. Nezar Seiti shihej si dëshmitar kyç në dosjen e Tahirit dhe ekstradimi i tij në Itali ka ngritur shumë pikëpyetje dhe është bërë objekt i një procedimi penal në Prokurorinë e Durrësit. Krimet e Rënda tentuan vetëm një herë ta merrnin në pyetje “financierin”, por ai ende ishte pa avokat në atë kohë. Tashmë, prokurorët shqiptarë presin që ai të merret në pyetje nga homologët italianë. Në Katania, njëri prej pjesëtarëve me kombësi italiane të grupit të Habilajve, është gati të bashkëpunojë me drejtësinë. Ai madje ka edhe disa hyrje- dalje në Shqipëri gjatë kohës që zhvillohej trafiku i lëndës narkotike. Konkretisht, ai ka hyrë në Shqipëri disa herë nga Porti i Vlorës. Dëshmia e tij mund të ketë interes edhe për hetimet në Shqipëri. Nezar Seiti u arrestua më 20 shtator në Babicë të Vlorës, gjatë një operacioni antidrogë. Për të kishte një urdhërarrest ndërkombëtar nga Prokuroria e Katanias dhe kërkohet si pjesë e grupit të drogës së Moisi Habilajt. Ai ka qenë mjaft aktiv, sipas dosjes italiane, në trafikun e drogës pas vitit 2015. Prokuroria e Krimeve të Rënda regjistroi procedim penal ndaj Seitit, ndërkohë që nisën edhe procedurat e ekstradimit të tij. Vetë i pandehuri pati shprehur dëshirë të ekstradohej dhe gjykohej në Itali. Mirëpo, ekstradimi i tij ndodhi në një kohë kur Krimet e Rënda nuk e kishin pushuar çështjen ndaj Seitit dhe ndaj tij kishte një masë sigurie të arrestit me burg. Mirëpo, kjo nuk e pengoi Ministrinë e Drejtësisë që t’i thoshte “po” ekstradimit të Seitit. “Financieri” u ekstrad- ua pas vendimit të formës së prerë të Gjykatës së Tiranës. Dukej që kjo Gjykatë nuk kishte marrë asnjë akt nga Krimet e Rënda për procedimin e Seitit. Pas ekstradimit, Prokuroria e Përgjithshme zhvilloi një mbledhje urgjente dhe më pas, Kryeprokurorja Marku urdhëroi menjëherë nisjen e hetimeve të rastit nga Prokuroria e Durrësit. Deri më tani, atje janë pyetur dy prokurorët e Krimeve të Rënda që hetonin Seitin dhe prokurorja që ndiqte çështjen e ekstradimit. Gjithashtu, është pyetur edhe drejtori i burgut ku qëndronte Seiti, si edhe avokati i tij, Detar Hysi. Nga ana tjetër, Këshilli i Lartë i Drejtësisë ka nisur hetim disiplinor ndaj gjyqtarit të Gjykatës së Tiranës, Kastriot Gramshi, i cili ka dhënë vendimin për ekstradimin e të dyshuarit. Nën hetim disiplinor janë edhe prokurorët e Krimeve të Rënda që kishin dosjen dhe ajo e Prokurorisë së Tiranës.