Rei Manaj: Nuk jam një “Baloteli”, do e rifitoj Interin
“Do kthehem si futbollist i madh në Serinë A”
Rei Manaj e ka rinisur nga Granada pas eksperiencave te Peskara e Piza, ku është rritur më tej, pavarësisht vështirësive, “lamtumirave” të parakohshme dhe rënies në kategorinë e tretë.
Larg nga Italia ka gjetur një realitet që beson tek ai dhe e vlerëson. Shpesh i krahasuar me Balotelin për arsye jashtë futbollit, u përgjigjet “gojëve të liga” se “nga ato që thonë, nuk më intereson asgjë. Unë i lë të flasin”. Në një intervistë të gjatë të dhënë për “FcInterNews”, sulmuesi 20- vjeçar shqiptar në pronësi të Interit rrëfehet duke zbuluar ndjesitë e lidhura me të kaluarën, të tashmen dhe të ardhmen, që ai uron të jetë tek Interi.
Te Granada flasin shumë mirë për ju qëkur jeni transferuar në Spanjë. Si po ndiheni atje?
Vërtet mirë, është një skuadër e rëndësishme dhe shumë persona ma këshilluan. I kam ndjekur këshillat dhe pranova destinacionin. Më priste një realitet që mund të luajë pa asnjë problem në La Liga. Shpresojmë ta arrijmë në fushë, mundësisht duke u renditur të parët ( pa “play- off”).
Nuk keni luajtur shpesh titullar, por trajneri beson te ju kur duhet të zhbllokohet ndeshja apo të rikuperohet disavantazhi. E ndieni besimin?
Po, me trajnerin jemi ballafaquar dhe më ka përsëritur besimin që klubi ka tek unë. Konkurrenca në skuadër është shumë e fortë: njëri prej tyre ka zbritur 40 herë në fushë në Ligën e Kampionëve ( flet për Adrian Ramos: paraqitjet europiane, sulmuesi, i ka zhvilluar me fanellën e Dortmundit). Unë kërkoj të stërvitem mirë dhe ndihem i qetë. Shpresoj që më tej, në këtë fund- sezoni, të më jepet mundësia për të shfaqur vlerat: dua të ndihmoj skuadrën të ngjitet në kategori me golat e mi!
Nga Peskara kaluat te Piza, ku trajner gjetët Gatuzon, aktualisht në pankinën e Milanit. I cili, në një rast, për ju, tha se i kushtoni rëndësi ecurisë personale sesa grupit. Një ko- ment?
Çdo person arsyeton në mënyrën e tij dhe shprehet si e mendon më mirë. Personalisht, nuk kam raport negativ me Rinon, jam i bindur se mediat e kanë fryrë shumë, madje tepër, çështjen. E nëse Piza bie nga kategoria, nuk mund të jem vetëm unë shkaktar: edhe pse, kur u transferova unë, skuadra ndodhej në një pozicion kritik në klasifikim. Pata përgjegjësinë time, sepse vlej sa për një, si gjithë të tjerët.
Me një rikthim në Milano do krijohej mundësia për ta ritakuar. Rast për një “hakmarrje” personale?
Hakmarrjen nuk e kam me Gatuzon. Objektivi, si në çdo derbi, është të mposhtet Milani.
Ju shqetëson etiketa e “bad boy”? Shumëkush ju krahason me Balotelin.
Çfarë thonë të tjerët më intereson shumë pak, janë fjalët e personave xhelozë. Shumica e njerëzve, me të cilët kam punuar nuk e mendon kështu.
Vazhdon t’i ndjekësh zikaltrit? Përse kalojnë periudha “terri”?
I ndjek shumë. Mbështes zikaltrit që kur isha i vogël dhe ndjek me pasion gjithçka ndodh në klub. Nuk e mohoj: kur humbasin, trishtohem. Momenti negativ? Të luash për Interin nuk është e lehtë, ka një ndryshim të madh me çdo skuadër tjetër. Dhe historia flet vetë. Unë shpresoj vërtet, u uroj, që të arrijnë Ligën e Kampionëve. Si e imagjinon rikthimin? Dua të kthehem në “San Siro” si lojtar i afirmuar. Dhe për ta treguar këtë, vendosa të shkoj diku tjetër, në një realitet më të vogël ku mund të gjej vazhdimësi. Një vendim si ky, nuk do e kishin marrë të gjithë.