Meta shtyn firmën për kufirin detar: Verifikim për negociatorët
Meçollari në takimet me Kotzias, Presidenti: Nuk besoj se kanë zhvilluar negociata teknike sepse do të ishte shkelje e rëndë
Presidenti i Republikës, Ilir Meta, deklaroi dje se i ka kërkuar sërish informacione shtesë Ministrisë për Europën dhe Punët e Jashtme për negociatat, që pritet të zhvillohen me Greqinë për marrëveshjen e detit.
I ftuar në “News 24” përballë gazetares Eni Vasili në “Studio e Hapur”, Meta foli dhe për akuzat ndaj negociatorit Artur Meçollari, për të cilin tha se ka kërkuar verifikime të thelluara nga shërbimet inteligjente. Meta u shpreh se kërkon që procesi i negociatave të jetë i “blinduar” nga ana ligjore në mënyrë që të mos rrëzohet sërish në Kushtetuese.
A është e vërtetë që ju e keni kthyer sërish në Ministrinë e Punëve të Jashtme letrën e informacioneve për të kërkuar informacion rreth takimeve me Kotzias? A keni kërkuar informacion shtesë?
Për të qenë sa më transparent, duhet të kemi në konsideratë që unë u detyrova për disa arsye, që u bënë edhe publike, për të sqaruar qëndrimin e Presidentit dhe Institucionit ndaj kërkesës së parë të Ministrisë për Europën dhe Punët e Jashtme - pa publikuar kërkesën e tyre, sepse nuk ka asnjë arsye që ta marrim ne këtë iniciativë - ashtu sikurse në kushte më normale edhe kur do të ekzistonin edhe lajme apo keqinterpretime lajmesh, kjo nuk kishte pse të bëhej publike, e kemi bërë të qartë çfarë kërkohet nga Institucioni i Presidentit, në mënyrë që të procedohej sipas vendimit të Gjykatës Kushtetuese. Pas kësaj, ka pasur një reflektim nga ana e Ministrisë për Europën dhe Punët e Jashtme, i cili përsëri në disa elementë është vlerësuar i domosdoshëm për t’u plotësuar më tej edhe ky është një proces që vazhdon.
Pra, keni kërkuar informacione të tjera përveç informacioneve të para?
Po, patjetër. E theksoj edhe një herë për të gjithë ata që nuk kuptojnë dhe thonë gjëra të tipit “çfarë është kjo, Presidenti ka prapë mundësi pasi të bëhet marrëveshja ta bllokojë, të mos e firmosë etj”. Jo vetëm që është detyra ime, sepse nuk ka detyrë më të rëndësishme se sa të respektoj Kushtetutën, sidomos kur ajo flet qartë se çfarë duhet të bëjë Presidenti dhe në këtë rast vendimi i Gjykatës Kushtetuese për herë të parë i ka elaboruar qartë përgjegjësitë e Presidentit sa u takon traktateve shtetërore. Jo marrëveshjet mes dy qeverive, por traktateve shtetërore. Së dyti, duhet të kemi parasysh se edhe një element formal i këtij vendimi të Gjykatës Kushtetuese, që është vetëm për këtë çështje dhe vetëm për çështjen me Greqinë, do të mjaftonte edhe një mosrespektim nga ana formale kushtetuese e këtyre kërkesave që nesër, edhe sikur të ishte një përmbajtje shumë e mirë, një grupim të ankohej përsëri në Gjykatën Kushtetuese dhe kjo të rrëzohej qoftë edhe për shkelje formale apo procedurale. Prandaj, është detyrë e Presidentit dhe e Institucionit të Presidentit për të bashkëpunuar dhe për të ndihmuar, që ky proces të ecë jo vetëm në shina kushtetuese, por edhe ana përmbajtjesore sa më sukses, sepse vetëm një proces që përmbyllet me sukses i shërben qëllimeve të tij dhe forcimit të marrëdhënieve me Greqinë.
Një ditë më parë ka mbërritur në zyrën tuaj lista me emrat e 12 negociatorëve shqiptarë, që do të ulet përballë palës greke. Një prej tyre, Artur Meçollari, është akuzuar fort për pastërtinë e figurës së tij. Berisha e akuzon si spiun. Çfarë do të bëni me emrin e tij?
Unë si President jam i detyruar të kërkoj informacione dhe sqarime nga institucionet përkatëse, pra nuk mund të komentoj në bazë të komenteve të raporteve të ndryshme politike. Për sa i takon rastit konkret, nuk mund të them se kam ndonjë informacion përveç atyre qëndrimeve të ndryshme që ju keni lexuar në media, por elementi më pozitiv për personin konkret është letra që kam lexuar që z. Meçollari i kishte dërguar ish- Prokurorit të Përgjithshëm, z. Llalla, kur ky i fundit ishte në këtë detyrë, ku ai protestonte për mbylljen e çështjes penale ndaj ekipit negociator, që kishte negociuar për marrëveshjen e viti 2009, duke dhënë shumë argumente dhe shumë fakte, sipas tij, një pjesë e të cilave ishin vërtet shumë interesante e që i ngarkonin normalisht me përgjegjësi negociatorët, me përgjegjësi ligjore, me përgjegjësi penale e që sipas tij Prokuroria në mënyrë jo të drejtë, e kishte mbyllur këtë çështje. Në këtë aspekt, unë nuk mund bëj gjykatësin, nëse ka të drejtë apo jo, por tregon që ka një ndjeshmëri, ka një përgjegjshmëri për integritetin që këta negociatorë duhet apo do të duhet të kenë gjithmonë kur përfaqësojnë interesat e shtetit.
Ju si President keni mundësi të merrni informacione nga shërbimet për Artur Meçollarin. Keni informacione për përputhshmërinë e këtij personi me procesin?
Ne kemi dërguar kërkesa në disa institucione për të gjithë negociatorët, për ndonjërin ndoshta duke kërkuar informacione më të veçanta, por s’mund të them asgjë pa i verifikuar këto informacione.
Ky person me këto hije dyshimi, pra Meçollari, ka qenë prezent në takimet me Kotziasin në Korçë. A është normale kjo?
Jo vetëm në Korçë, por ka qenë dhe në një takim në vitin 2014 dhe MPJ nuk është se e ka fshehur këtë fakt. Kjo mbetet për t’u vlerësuar, por nuk besoj se kanë zhvilluar negociata teknike, sepse do të ishte shkelje e rëndë e Kushtetutës aq më shumë se zotëria është ushtarak.
A cenohet integriteti i tij qoftë nga sa është thënë deri tani për të qenë pjesë e grupit negociator?
Për faktin se ka qenë në Korçë apo në takime të mëparshme me ministrin e Jashtëm, kjo varet nga arsyet pse ka qenë në takim. Kjo varet nga arsyeja që ka qenë në takime, nëse ka qenë për negociata, atëherë kjo është një gjë shumë e rëndë, por unë nuk e besoj se do ketë ndodhur. Për faktet që pretendojnë ish- ministri i Mbrojtjes, ish- drejtori SHIU- t apo zoti Berisha, këto mbeten për t’u verifikuar në rrugë institucionale.
Pse insistoni kaq shumë në zbatimin strikt të vendimit të Gjykatës Kushtetuese për çështjen e detit?
Është detyra ime, sepse unë mbaj përgjegjësi edhe ligjore nesër për mosrespektimin e këtyre kërkesave. Përveçse mbaj përgjegjësi dhe politike, Presidenti ka përgjegjësinë e vet pse nuk u zbatua kjo kërkesë e gjykatës.
Duket sikur ju doni ta zvarrisni këtë proces, aq më shumë që Tsipras vjen për Pashkë në Shqipëri?
Unë dua që këtë proces ta blindoj nga ana kushtetuese, por dhe nga ana e përmbajtjes. Unë këtu kam qenë që nga 24 korriku, në rast se ka pasur mundësi që kjo gjë të bëhej përpara. Veprimet e Presidentit kanë qenë më të shpejtat e mundshme. Për qëndrimet tona kemi angazhuar dhe shumë nga kualitetet më të mira të së Drejtës në vend dhe të marinës.
Çelja e negociatave kërkon kurbane të mëdha, peshq të mëdhenj. Çfarë kuptoni ju me peshqit e mëdhenj?
Kërkohet besueshmëri në zbatimin e ligjit dhe kërkohet reformë dhe jo regji. Në këtë , të gjithë janë të lutur të zbatojnë ligjin dhe çdo institucion të ketë besueshmëri, rezultate dhe hetime, të ketë sa më pak politizim të reformës apo humbje besimi te zbatimi i besueshëm i saj. A ka Shqipëria peshq të mëdhenj që duhen kapur? Nuk jam shenja ujorit, jam shenja e dashit, kështu që mos vazhdojmë me këtë përcaktim. Unë besoj se kjo është reformë mjaft serioze dhe kërkon përgjegjësi nga gjithë , që janë angazhuar në këtë reformë.
Prokurorja e re e ka nisur me kapjen e disa peshqve të vegjël , që për koincidencë vijnë nga radhët e opozitës deri tani, disa drejtorë rrugësh.
Për mua shqetësim nuk janë arrestimet që kanë ndodhur dhe mund të ndodhin, gjithçka të bëhet në bazë të provave, vullnetit për të vendosur drejtësi pa paragjykime. Këto janë procese që do shikohen dhe do monitorohen. Të rritet besimi te Prokuroria, te Gjykatat dhe problem më shumë nuk janë arrestimet, por mosarrestimet. Pra, drejtues të cilët kanë fletë arresti, por që nuk arrestohen. Ky është problem serioz që duhet adresuar.
Ndihet sikur është vënë në shënjestër forca politike që ju keni drejtuar dikur?
Për mua ligji duhet të jetë i barabartë për të gjithë që nga Presidenti, Kryeministri, kryetari i Parlamentit çdo politikan. Për sa i takon forcës që unë kam drejtuar, ajo duhet të jetë tepër e qetë, sepse nuk ka asnjë detyrim ndaj asnjë ish- ministri, ish- drejtori apo ish- zyrtari të lartë, i cili mund të ketë shkelur ligjin apo të këtë bërë korrupsion apo krim për një arsye shumë të thjeshtë, sepse në kohën që unë kam drejtuar LSI-, unë s’kam bërë njeri me pahir ministër apo drejtor. Të gjithëve u kam kërkuar që gjithmonë të respektojnë ligjin sepse në fund ata do të jenë përgjegjës për vetën e tyre, familjet e tyre, por edhe pozitën publike që kanë dhe të mos bëjnë asnjë veprim jashtë ligjit. Ai që ka shkelur ligjin, të përgjigjet për shkeljen.