U dënua nga ish- kolegët, Andrea padi në Kushtetuese
Ish- gjyqtarja Majlinda Andrea, e cila u dënua për korrupsion, ka animuar vendimin e Gjykatës së Lartë në Gjykatën Kushtetuese. Sipas pretendimeve të Andreas, Gjykata e Lartë nuk ka kompetencë që ta gjykojë dhe kërkon prishjen e vendimit. Ajo u dënua me 3 vjet shërbim prove, së bashku me bashkëshortin e saj, Odhise Andrea, për një skandal korrupsioni, ku ka marrë para për të dhënë një vendim pro një pale në një çështje prone. Tashmë, ajo pretendon se Gjykata e Lartë nuk ka qenë kompetente për të gjykuar çështjen e saj. Sipas argumentimit të mbrojtësve të Andreas, dorëzuar në Gjykatën Kushtetuese, Gjykata e Lartë nuk ka juridiksion fillestar, pas ndryshimeve Kushtetuese në kuadër të Reformës në Drejtësi. Ajo do të duhej të gjykohej nga Gjykata Speciale, por në kushtet kur kjo nuk është formuar ende, atëherë dosjet duhet të kalonin te Krimet e Rënda. Korrupsioni i gjyqtares nisi kur shtetasi Ilia Çabiri, në cilësinë e përfaqësuesit të një familjeje ish- pronare, ka zhvilluar disa procese gjyqësore për njohjen e një sipërfaqeje toke rreth 40 hektarë, në zonën e Butrintit. Çabiri është angazhuar që procesi gjyqësor në Gjykatën e Lartë të përfundonte në favor të tij. Për këtë arsye, ai ka kontaktuar me Petraq Dashin, i cili nga ana e tij kishte njohje dhe komunikim me Odhise Andrean. Petraq Dashi nënshkroi një kontratë fiktive me Ilia Çabirin dhe Eleni Linon, në bazë të së cilës ai deklaronte se u huazonte shumën prej 50 mijë eurosh. Në fakt, këtë shumë Dashi ia dorëzoi bashkëshortit të ish- gjyqtares së Gjykatës së Lartë, shtetasit Odhise Andrea, me qëllim dhënien e vendimit në favor të Çabirit dhe Linos.