Shuhet Gëzim Qendro, studiuesi dhe historiani i artit
Homazhet për nder të tij, sot nga ora 10: 0011: 00, në Galerinë Kombëtare të Arteve
“Bëra ato, për të cilat kisha ardhur e tani po iki... Ca gjëra më kanë mbetur përgjysmë, por do t’i vazhdojë Gea...
Të tjera do t’i marr me vete”. Kështu i ishte rrëfyer në bisedën e fundit mikut të tij, piktorit Xhovalin Delia. Studiuesi, historiani dhe kritiku i artit, njeriu që punonte pa bërtitur, i patrazuar në zhurmnajën punëboshe, Gëzim Qëndro, u nda dje nga jeta. Pas një sëmundjeje pa shërim, Qendro u largua nga kjo jetë, duke lënë pas bashkëshorten, Artën, dhe vajzën Gea, familjarë e miq, por edhe shumë punë përgjysmë. Qendro iu përkushtua punës deri në ditët e fundit të jetës, duke lënë një gur të rëndësishëm në fushën që ai mbulonte, por edhe një boshllëk të madh në radhët e intelektualëve dhe studiuesve seriozë. Lajmi i vdekjes së Qendros ka qenë tronditës për të gjithë ata që e njohën dhe ndanin pikëpamje të njëjta apo të kundërta me të për çështje të artit e politikës. Rrjetet sociale u mbushën dje me mesazhe ngushëllimi për njeriun e rrallë dhe studiuesin e përkushtuar. Shumëkush ndau kujtime nga miqësia me të, bashkëpunimet apo bisedat e fundit. Të gjithëve do t’u mbetet në mendje imazhi i tij i gjatë, i hollë dhe një krifë flokësh, së fundmi të thinjur, teksa baret në salla ekspozitash e auditore universitetesh. Homazhet në nderim të personalitetit të Artit, Gëzim Qëndro do të mbahen sot nga ora 10: 0011: 00, në Galerinë Kombëtare të Arteve, institucion të cilin ai e ka drejtuar 15 vjet më parë.
KARRIERA Gëzim Qendro ishte Profesor i Asociuar i Teorisë së Artit dhe Kritikës, shef i Departamentit të Arkitekturës dhe Dizajnit, në universitetin “POLIS”, në Shqipëri. Është diplomuar në “Academie voor Beeldende Vorming”, Amsterdam, Holandë ( 1992- 1996) dhe ka mbrojtur doktoraturën në Estetikë në universitetin “Paris VIII” ( 2009) për pikturë. Ka qenë drejtor arti i filmave të an- imuar në ish- Kinostudion “Shqipëria e Re”, drejtor i Galerisë Kombëtare të Arteve në Tiranë ( 19972002), drejtor i revistës së artit “PamorART” ( 19982002), bashkëdrejtor dhe një nga kuratorët e tri edicioneve të para të Bienales në Ti- ranë, kurator i ekspozitave “Surrealizmi socialist”, “Homo Socialisticus”, “Post EVA”, “Nostalgji”, “Glocal”; bashkëkurator i ekspozitës “In & Out”; ka marrë pjesë në konkursin e përvitshëm mbi artin bashkëkohor “Onufri” ( 1997, 2001). Ekspozita të tjera të kuruara nga ai janë: Çmimi Myslim Mulliqi, Antologjia e Shpresës, Koordinatat Onirike të Nënvetëdijes, Zbrazëtia Ludike e Objektit, Mes Orientit dhe Oksidentit. Që prej vitit 1992 ka botuar mbi 100 artikuj në shtypin shqiptar dhe të huaj mbi çështje rreth historisë së artit shqiptar. Është autor i tri monografive për artistët shqiptarë: “Arkeologjia e Mëngjesit ( Dituria), “Heronjtë janë të uritur” ( Onufri), “Surrealizmi socialist” ( l’Harmattan) dhe përkthyes i 14 titujve librash, të lidhur kryesisht me historinë e artit dhe teorinë e artit. Ka qenë gjithashtu një nga kuratorët e Muzeut “Shtëpia me gjethe” dhe anëtar i jurisë së Ministrisë së Kulturës për Bienalen e Venecias.