Bushati sulmon Presidentin për kufirin, Meta: E vërteta për tri takimet
Degjeneron seanca dëgjimore me ministrin, Paloka: Shko në bordellot e Brazilit dhe fol kështu... More vesh, legen.
Ministri i Jashtëm, Ditmir Bushati, deklaroi dje se Presidenti i Republikës i kishte kërkuar sërish informacione shtesë për kërkesën për autorizim për negociata me Greqinë për Detin. Gjatë seancës dëgjimore në Komisionin e Politikës së Jashtme, Bushati ironizoi dje me Ilir Metën, teksa tha se edhe ai i “shkreti” nuk e kishte të qartë procedurën ligjore për negociatat. “Nuk lëshon plotfuqishmëri Presidenti. Edhe ai i shkreti e dinte gabim dhe sot thotë që, “po, kam autorizimin”. Njerëzit rreth e përqark tij ia kanë thënë gabim”, tha dje Bushati. Duke folur për akuzuat ndaj Artur Meçollarit, ministri i Jashtëm nxori dje dokumentacionet që, sipas tij, vërtetojnë se Ushtaraku është i certifikuar nga NATO dhe DSIK. Ai kërkoi nga deputetët të mos sulmojnë grupin negociator, pasi kanë krijuar shqetësim dhe te partnerët strategjikë ndërkombëtarë. “Partnerët strategjikë kanë ardhur në zyrën time dhe në zyrën e Ministrisë së Mbrojtjes, të alarmuar për shpifjet e orkestruara ndaj këtyre individëve dhe në adresë të personaliteteve të Ushtrisë Shqiptare, që janë pjesë e ekipit negociator pas autorizimit nga Presidenti dhe lëshimit të plotfuqisë nga ana ime”, ka thënë dje Bushati. Por Edi Paloka ka thënë se Artur Meçollari është spiun i agjenturave të vendeve jo partnere dhe këto fakte i janë fshehur NATO- s. Gjatë seancës, ministri ka shkëmbyer replika me deputetin e PDsë, Paloka. Acarimi i toneve filloi gjatë momentit që Bushati po ironizonte mënyrën dhe me gabimet drejtshkrimore që deputetët e opozitës kishin formuluar pyetjet për seancën dëgjimore. “Shko në bordellot e Brazilit dhe fol kështu.. More vesh, legen”, iu drejtua Paloka, ministrit Bushati.