Provimi për punësim, si do testohen 6 mijë mësues
Nikolla: Testimet dixhitale, nga data 6 mars deri më 30 prill
Zbardhet udhëzimi i Ministrisë së Arsimit për testimin e mësuesve kandidatë për të zënë një vend pune në sistemin parauniversitar.
Ishte ministrja Lindita Nikolla, ajo që bëri publike datën e nisjes si dhe mënyrën si do të zhvillohet provimi për rreth gjashtë mijë mësues që kanë kaluar fazën e parë të konkurrimit, dorëzimin e dosjes. Me rëndësi, sipas ministres, është shmangia e ndërhyrjeve, si në vlerësimin e testimit, ashtu edhe në punësimin e mësuesve. “Portali starton në datën 6 mars dhe përfundon në datën 30 prill, një standard i ri i meritës së transparencës, duke mundësuar një shërbim ku kontaktet e jashtme, si në vlerësimin e testimeve janë 0, ashtu edhe në procesin e emërimit. Ajo që është shumë e rëndësishme; kemi mundësuar falë punës së specialistëve, një situatë ku korrupsioni e ka të pamundur për të ndërhyrë si në procesin e vlerësimit të testimeve, por edhe më pas, kur mësuesi t’u drejtohet shkollave të Shqipërisë”, nënvizoi ministrja dje gjatë takimit me disa nga mësuesit garues. ORGANIZIMI I
TESTIMIT Ndryshe nga vitet e kaluara, testimi do të zhvillohet në formë dixhitale në mjediset e Qendrës së Shërbimeve Arsimore ( ish- AKP). Kjo e fundit, brenda pak ditëve pritet të publikojë kalendarin e datave për secilin profil mësuesie e bashkë me të edhe kandidatët që testohen përgjatë dy muajve, të dhëna këto që i merr nga Qendra Ndërinstitucionale e Rrjetit Akademik Shqiptar. Instituti i Zhvillimit të Arsimit ka hartuar tashmë programet orientuese e në bazën e tyre edhe fondin e pyetjeve dhe testimet sipas grupimeve kryesore të profileve, si dhe sipas nivelit të vështirësisë: të lehtë, mesatar dhe të vështirë, që vlerësohen përkatësisht me 1, 2 dhe 3 pikë. Sakaq, do të jenë pesë lloje testimesh: testime për mësuesit e arsimit parashkollor; për mësuesit e arsimit fillor; për mësuesit profesionalë të muzikës, artit pamor e baletit, për mësuesit e kulturës profesionale të arsimit special, si dhe në 18 profilet e njohura të mësuesisë që nga gjuha shqipe e letërsia deri tek edukimi fizik. Pak a shumë, mënyra e testimit të mësuesve që kandidojnë për një vend pune, është i ngjashëm me provimin e licencimit, veçse gjatë zhvillimit të tij do të ketë përveç përfaqësuesve nga QSHA, edhe 1 ose 2 nga Ministria, të cilët sigurohen për mbarëvajtjen e procesit.
VLERËSIMI I KANDIDATËVE Ashtu si provimi, edhe vlerësimi do të bëhet manualisht. Secili prej mësuesve që i nënshtrohet provimit, do të informohet menjëherë pas tij me numrin e pikëve që ka marrë. Testimi dixhital përmban 50 pyetje, përgjigjet e sak- ta të të cilave vlerësohen me 100% dhe konvertohen në 70 pikë. Të mbledhura këto me pikët e dosjes ( maksimalisht 30) përbëjnë totalin e pikëve të kandidatit që e rankojnë në listëpritjen për një nga vendet e punës që mund të hapen në profilin e tij. Kandidatët që janë testuar vitet e kaluara dhe duan të mbajnë pikët që kanë, nuk janë të detyruar të futen në provim. Pikët e tij dërgohen nga njësia arsimore vendore në MAS dhe do të shërbejnë për renditjen përfundimtare që do të bëjë Qendra Ndërinstitucionale e Rrjetit Akademik Shqiptar.