Meta e përgënjeshtron: Tri takimet me Bushatin
“U fol për ambasadorët, në fund më kërkoi autorizimin”
Përplasja mes institucionit të Presidencës dhe Ministrisë së Jashtme është thelluar akoma më shumë në lidhje me dhënien e autorizimit për negociatat me Greqinë.
Përmes një reagimi për mediat, zëdhënësi i Presidencës, Tedi Blushi, përgë- njeshtroi deklaratat që ministri i Jashtëm, Ditmir Bushati, bëri gjatë seancës dëgjimore në Ko- misionin e Jashtëm në Kuvend. Zëdhënësi i kreut të shtetit konfirmoi se mes Metës dhe Bushatit janë zhvilluar tri takime, por përmbajtja e tyre është e ndryshme nga ajo që përfaqësuesi i qeverisë ka pretenduar gjatë deklarimeve të tij në Komisionin e Jashtëm. “Është e vërtetë që janë zhvilluar tri takime me kërkesën e ministrit Bushati, posaçërisht në datat 6 tetor 2017, 18 janar 2018 dhe 9 shkurt 2018. Në takimin e datës 6 tetor, vendin kryesor e ka zënë kërkesa e MEPJ për t’i akorduar gradën diplomatike ‘ Ambasador’ ambasadorit të Shqipërisë në detyrë në Beograd, z. Ilir Bocka, si dhe kërkesa për të pranuar në parim propozimin për të emëruar ambasador në NATO z. Igli Hasanaj. Presidenti i Republikës firmosi menjëherë mbas takimit, atë ditë, dekretin për z. Bocka dhe pranoi në parim kandidaturën e z. Hasanaj, duke kërkuar kohë për verifikimet përkatëse. Ky takim nuk zgjati më shumë se 15 minuta. Gjatë takimit të dytë sqarojmë se z. Bushati, çështje kryesore kishte sqarimin për votimin në OKB dhe çështje të përgjithshme të personelit diplomatik jashtë vendit. Ai shprehu njëkohësisht ndjesën dhe keqardhjen për moskoordinimin e tij me Kryeministrin Rama lidhur me ndryshimin e propozimit për z. Igli Hasanaj nga ambasador në NATO për në OSBE. Në fund të takimit, zoti Bushati i tha zotit Meta se të nesërmen do të shkonte në Korçë për të takuar zotin Kotzias për të zgjidhur të gjitha çështjet e trashëguara mes dy vendeve. Zoti Meta e inkurajoi që të vazhdojnë frymën e bashkëpunimit pozitiv, si e vetmja rrugë për të dyja vendet tona. Edhe ky takim nuk ka zgjatur më shumë se 15 minuta”, sqaron zëdhënësi i Presidentit.
TAKIMI Në Komisionin e Jashtëm, Bushati deklaroi se Presidenti i Republikës ndryshoi qëndrimet e tij, duke pranuar se ka pasur informacione për negociatat dhe për takimet me Bushatin. Kreu i diplomacisë kujtoi se Presidenca dhe Ministria e Jashtme janë dy institucione që ruhen nga Garda e Republikës dhe hyrje- daljet e njerëzve janë të monitorueshme. Zëdhënësi i Metës, ka zbardhur edhe takimin e tretë të zhvilluar mes Metës dhe Bushatit pas takimeve të këtij të fundit me Kotzias. Në një kohë që në media është folur për zgjidhjen e një sërë çështjesh me Greqinë, zëdhënësi i Presidentit konfirmon se vetëm në fund të takimit, Bushati i foli Metës për negociatat duke i kërkuar edhe një autorizim për grupin negociator. “Në datën 9 shkurt është zhvilluar takimi i tretë, përsëri me kërkesën e ministrit Bushati. Çështja kryesore e ngritur nga zoti Bushati ishte emergjenca për emërimin e dy ambasadorëve të rinj në UNESCO dhe në Gjenevë. Zoti Meta i premtoi se kjo gjë do të ndodhte menjëherë dhe po atë ditë, Presidenti Meta firmosi dy dekretet për emërimet e kërkuara nga ministri Bushati. Në fund të këtij takimi, zoti Bushati i tha zotit Meta se bisedimet me zotin Kotzias kishin vajtur shumë mirë në përgjithësi dhe i duhej një autorizim për të mbyllur marrëveshjen e detit. Zoti Meta i bëri të qartë zotit Bushati edhe një herë rëndësinë e madhe që ai i ka kushtuar dhe i kushton marrëdhënieve me Greqinë, duke e sqaruar se komunikimi për këtë çështje të rëndësishme do të jetë gjithmonë zyrtar dhe shkresor, ndërsa kërkesa për autorizim të vinte sipas procedurave të përcaktuara qartë nga vendimi i posaçëm i Gjykatës Kushtetuese për këtë çështje. Ky takim nuk i ka kaluar 10 minutat”, sqaroi Blushi.