ONM kërkon shkarkimin e një anëtari të vetingut
"Heral Saraçi ka kryer shkelje disiplinore, të shkarkohet"
Pa nisur ende mirë procesin e vetingut, Operacioni Ndërkombëtar i Monitorimit ka rekomanduar nisjen e procedimit disiplinor për bashkëkryetarin e Komisionerëve Publikë, gjyqtarin Heral Saraçi.
Operacioni Ndërkombëtar i Monitorimit, i cili prej disa muajsh është vendosur pranë zyrave të Komisionit të Pavarur të Kualifikimit, ka konstatuar se anëtari Heral Saraçi ka kryer shkelje disiplinore dhe bazuar në ligjin "për rivlerësimin e gjyqtarëve dhe prokurorëve", ka depozituar pranë Kolegjit të Posaçëm të Apelimit, kërkesën për nisjen e procedurave për shkarkimin e tij. Këtë fakt e ka konfirmuar publikisht dhe Kolegji i Posaçëm i Apelimit, institucion që ka postuar në faqen e tij zyrtare njoftimin e parë për mediat dhe në të cilin njoftohet seanca gjyqësore ku do të shqyrtohet rasti i dënimit apo jo të një kolegu. Në Ligjin e Vetingut thuhet se procesi i shkarkimit nis vetëm kur për anëtarin disponohen prova apo burime të sigurta për kryerjen e shkeljes. "Procedurat për shkarkimin e anëtarit të institucioneve të rivlerësimit. Në rast se ka të dhëna të mjaftueshme nga burime të besueshme se anëtari i institu- cioneve të rivlerësimit ka kryer një shkelje disiplinore, ndaj tij fillon hetimi disiplinor", thekson pika 1 e nenit 17 të Ligjit të Vetingut. Duket se komisionari publik Heral Saraçi nuk i ka pranuar akuzat e ngritura nga ONM, ndaj ka kërkuar që të behët një proces i rregullt ligjor. Sipas nenit 17 pika 3, thuhet se: "Në rast se anëtari i institucionit të rivlerësimit jep dorëheqjen nga detyra, procedura hetimore mbyllet pa një vendim përfundimtar". Por anëtari Saraçi nuk ka pranuar të dorëhiqet dhe sipas ligjit kanë vijuar procedurat për ngritjen e Komisionit Disiplinor.
GJYKIMI
Për shqyrtimin e rastit të komisionerit publik Heral Saraçi, Kolegji i Posaçëm ka caktuar datën 5 mars për të zhvilluar seancën dëgjimore të gjyqtarit, për të cilin ONM ka kërkuar shkarkim. Po ashtu, Kolegji i Posaçëm ka caktuar me short trupën që do të drejtojë Komisioni Disiplinor, e cila do të drejtohet nga gjyqtari Sokol Çomo, Albana Shtylla, Ardian Hajdari. "Ditën e hënë, datë 5 mars 2018, ora 12.00 do të zhvillohet seanca dëgjimore për shqyrtimin e procedimit disiplinor ndaj komisionerit publik z. Heral Saraçi. Ky procedim disiplinor ka filluar me kërkesë të vëzhguesve ndërkombëtarë të Operacionit Ndërkombëtar të Monitorimit. Lidhur me këtë procedim disiplinor, gjyqtari hetues, zj. Natasha Mulaj, ka depozituar në datë 26 shkurt 2018, për shqyrtim pranë Komisionit Disiplinor, Raportin mbi rezultatet e hetimit për shkelje disiplinore. Komisioni Disiplinor përbëhet nga: 1. Z. Sokol Çomo, Gjyqtar ( Kryesues) 2. Zj. Albana Shtylla, Gjyqtare ( Anëtare) 3. Z. Ardian Haj- dari, Gjyqtar ( Anëtar)", thuhet në njoftimin e Kolegjit të Posaçëm të Apelimit. Nuk dihet ende çfarë shkelje ka kryer komisionari publik Heral Saraçi, por të gjithë anëtarët e komisioneve të vetingut janë në përgjim 24 orë nga ONM. Në formularin që anëtarët e komisioneve të vetingut kanë nënshkruar, thuhet se: "Jam dakord që këto komunikime, duke përfshirë numrin ose numrat e telefonit që kam në përdorim dhe adresa ose adresat e postës elektronike, t'i nënshtrohen monitorimit nga Byroja Kombëtare e Hetimit, përfshirë leximin e postës elektronike, mesazheve tekst, dëgjimin e bisedave dhe formave të tjera të komunikimit elektronik, në përputhje me ligjin për organizimin dhe funksionimin e institucioneve për të luftuar korrupsionin dhe krimin e organizuar".