Vrasja e Memli Begallës, Gjykata lë në burg autorët
Motivi, Begalla i premtoi Serezit se do e lironte nga burgu
Gjykata e Tiranës caktoi masat e sigurisë “arrest me burg” për Denis Demirin dhe Ardian Serezin, dy të prangosurit si autorë të vrasjes së biznesmenit Memli Begalla.
Ngjarja ka ndodhur në zonën e ish- bllokut, më 14 shkurt të këtij viti. Seanca e ditës së djeshme u zhvillua me dyer të mbyllura, por “Panorama” mëson se pista kryesore për motivin e vrasjes dyshohet të ketë qenë një premtim i pambajtur i Begallës ndaj Serezit që lidhet me sekuestrimin e një sasie prej 1 ton kanabis në Gjirokastër në vitin 2014. Për operacionin e atëhershëm, mes të arrestuarve ishte edhe Ardian Serezi, njëri prej autorëve të vrasjes së biznesmenit Begalla. Sipas hetimeve, Begalla i ka premtuar Serezit kur u arrestua, se ai do të bënte çmos që ta nxirrte nga burgu. Por nuk ndodhi kështu. Ky ka qenë edhe motivi i vrasjes që po hetohet si pistë kryesore, por nuk përjashtohet edhe pista e borxheve të pashlyera. Ajo që çoi grupin hetimor drejt identifikimit të autorëve ishte një gabim i njërit prej autorëve, i cili hoqi maskën pas kryerjes së krimit dhe fytyra e tij u fiksua nga një kamerë e sigurisë. Më pas, Prokuroria nisi përgjimet ndaj të dyve, duke shoqëruar persona të tjerë si autorë të dyshuar për vrasjen. Kjo bëri që në bisedat telefonike, dy autorët të flisnin për vrasjen, duke u shprehur optimistë se ia kishin hedhur drejtësisë.
AUTORET Dy personat të vënë nën akuzë për vrasjen e biznesmenit 64- vjeçar, Memli Begalla, rezultojnë me precedentë të më- parshëm penal. Personi që, sipas Policisë, është ekzekutori, Denis Demiri, ka qenë i dënuar më parë për një tentativë vrasjeje. Ngjarja për të cilin ai ishte dënuar, ka ndodhur më 2 prill të vitit 2012, në afërsi të maternitetit “Koço Gliozheni”, kur ai tentoi të vriste me armë zjarri shtetasin me iniciale F. M., me pretendimin se i kishte shqetësuar të fejuarën. Por Policia arriti të parandalonte ngjarjen dhe arrestoi autorin e dyshuar, para se ai të shkrepte armën. Nga ana tjetër, personi tjetër që u ar- restua dje, Ardian Serezi, ishshofer i Parkut të Ministrisë së Brendshme, kishte vetëm pak kohë që ishte liruar nga burgu. Në shkurt të vitit 2014, ai u arrestua gjatë një operacioni të Policisë së Gjirokastrës, teksa po transportonte 1 ton kanabis. Sipas grupit hetimor, dyshohet se këtë sasi droge ai po e tentonte ta trafikonte për llogari të biznesmenit Begalla. Për këtë rast, në atë kohë pati edhe një reagim të Partisë Demokratike, përmes deputeti Flamur Noka, i cili denon- conte se Serezi ishte i afërm i ish- ministrit të Brendshëm, Saimir Tahiri.
VRASJA Dy të akuzuarit për vrasjen e Memli Begallës e kishin planifikuar prej kohësh krimin. Ata janë afruar më 14 shkurt në zonën ku banonte biznesmeni me një automjet tip “BMW”. Të maskuar me kapuça, ata kanë ndjekur biznesmenin nga pas, kur ai i afrohej banesës në rrugën “Nikolla Tupe”, rreth orës 21: 00 dhe e kanë qëlluar me një plumb në kokë. Arma që kanë përdorur ka qenë me silenciator. Sipas kamerave të sigurisë të bizneseve aty pranë, dy autorët shihen të kthehen mbrapsht dhe të largohen nxitimthi te automjeti me të cilin kishin ardhur në zonën e ishBllokut. Më pas, ata janë larguar në drejtim të zonës së “Laprakës”. Aty pranë, njëri prej tyre ka hequr kapuçin duke ekspozuar fytyrën në një kamerë sigurie. Kaq ka mjaftuar që Policia të nisë hetimet ndaj tij dhe të zbulojë vrasjen dhe dinamikën e saj.