Dështon Demarkacioni gjatë vizitës së zyrtarëve të BE
Komplikohet situata, “LDK ndryshoi marrëveshjen”
Seanca e Demarkacionit dështoi të mërkurën në Kuvendin e Kosovës me gjithë ultimatumet nga ambasadorët e vendeve mike më të fuqishme të vendit, që deputetët ta ratifikojnë këtë marrëveshje në këmbim të liberalizmit të vizave me BE.
E nënshkruar që në vitin 2015, kjo marrëveshje ka mbetur peng pas pretendimeve të palëve të ndryshme, në atë kohë në opozitë, përfshirë edhe AAK- në e Kryeministrit aktual, Ramush Haradinaj, se mundësonte humbjen e disa kilometrave territor në favor të Malit të Zi. Kuvendi i Kosovës e ktheu në shqyrtim pas një aneks- marrëveshjeje mes presidentëve të dy vendeve, se edhe pas ratifikimit, çështja do të rishikohej nga ekspertët në pikat e kontestuara. Për të tretën herë brenda disa ditësh, Kuvendi i Kosovës e ka shtyrë ratifikimin e Demarkacionit për një ditë tjetër, pa specifikuar se kur. Arsyeja është mungesa e votave në mbështetje të marrëveshjes me Malin e Zi.
VESELI
Kryeparlamentari Kadri Veseli, ka shprehur zhgënjimin që as të mërkurën nuk u zgjidh çështja e kufirit me Malin e Zi. Sipas tij, "Takimi dhe biseda me Presidentin e Komisionit Europian, Jean Claude Juncker dhe zyrtarët e tjerë të lartë të BE- së, ishte një konfirmim i perspektivës së qartë europiane të Kosovës... Sot, ne mund të ishim të suksesshëm dhe krenarë. Izolimi dhe dështimi nuk janë opsione që ndihmojnë qytetarët tanë. Shtyrja e seancës, si kërkesë disaditëshe për konsensus, dhe mosvotimi pikërisht në ditën e vizitës së zyrtarëve më të lartë të BE- së, nuk do t'i ndihmojë lëvizjes së lirë të qytetarëve tanë", ka reaguar Veseli.
AKUZAT NDAJ LDK
Ndërkohë, çështja është komplikuar gjatë mbrëmjes së të mërkurës, pasi AAK ka akuzuar LDK se ka ndryshuar marrëveshjen në Komisionin për Politikë të Jashtme. "Në tekstin që ka dalë nga ky Komision, jo vetëm që është ndërruar renditja e pikave të dakorduara, por dokumentacioni zyrtar i Komisionit Shtetëror, është renditur si pikë e fundit dhe jashtë pjesës përbërëse të këtij ligji", ka deklaruar AAK. "Kryeministri Haradinaj, kryetari i Kuvendit Veseli, Shefi i GP Abdullah Hoti, Kryetari Nisma- s Limaj dhe ai i AKRsë Pacolli, kanë arritur marrëveshjen për Demarkacionin! Ndërkohëk teksti i kësaj marrëveshjeje është ndryshuar në Komisionin për punë të jashtme të Kuvendit, që kryesohet nga LDK- ja, duke e rrezikuar kështu gjithë atë që është arritur me shumë mund për të ardhur deri në këtë pikë... Ky është alarm për të gjithë protagonistët e kësaj marrëveshjeje, që të mos bëjnë kalkulime politike, por t'i përmbahen pikë për pikë asaj! Në të kundërtën, rrezikohet që gjithçka të kthehet në pikën ZERO!", thuhej në reagimin e AAK- së.