RREGULLAT E PROVIMIT
Neni 12
Detyrat e kandidatëve: 1. Nëse një kandidat nuk paraqitet në testim ose tërhiqet përpara fillimit të tij, atëherë testimi nuk vlerësohet si i kryer. 2. Tërheqja nga testimi i informatizuar nuk mund të kryhet pas hyrjes në sallën e testimit. 3. Në rast se kandidati do të tërhiqet nga testimi i informatizuar pas fillimit të testimit, në përfundim të testimit duhet të nënshkruajë deklaratën me rezultatin e marrë. 4. Kandidati që del nga salla e testimit, nuk do të rihyjë në sallë gjatë zhvillimit të testimit.
Neni 14
Mënyra e vlerësimit të kandidatëve 1. Vlerësimi i kandidatëve bëhet nëpërmjet dy fazave: a) Faza e parë: vlerësimi i përfituar nga dokumentet e dosjes së kandidatit sipas rezultateve të dërguara nga njësitë arsimore vendore në Qendrën Ndërinstitucionale të Rrjetit Akademik Shqiptar, në bazë të udhëzimit të MASR.
b) Faza e dytë: vlerësimi i përfituar nga testimi i informatizuar ( në masën 70 pikë)
2. Teza e testimit të informatizuar përmban 50 pyetje, përgjigjet e sakta të të cilave vlerësohen me 11 për qind, që konvertohet në 70 pikë.
3. QSHA bën konvertimin e vlerësimit të testimit të informatizuar dhe ua dërgon MASR, njësive arsimore vendore dhe Qendrës Ndërinstitucionale të Rrjetit Akademik Shqiptar. 4. Qendra Ndërinstitucionale e Rrjetit Akademik Shqiptar bën mbledhjen e pikëve të të dyja fazave dhe shpalljen në portal të rezultateve përfundimtare të vlerësimit të kandidatëve.
Neni 16
Llojet e testimit të informatizuar Testimet e shpallura për kandidatët janë: a) Testim i arsimit parashkollor b) Testim i arsimit fillor c) Testim për profilet: gjuhë shqipe dhe letërsi, gjuhë angleze, gjuhë frënge, gjuhë italiane, gjuhë gjermane, matematikë, fizikë, biologji, kimi, histori, gjeografi, teknologji informacioni dhe komunikimi, shkenca shoqërore, ekonomi, edukim fizik, muzikë, art pamor si dhe profile të tjera specifike brenda planeve arsimore, sipas kërkesave nga njësitë arsimore vendore
d) Testim për degët muzikë, art pamore dhe balet në kulturën profesionale në shkollat artistike
e) Testim i përgjithshëm për mësuesit e kulturës profesionale në arsimin special
Neni 21
Modalitetet e zhvillimit të testimit të informatizuar
1. Për çdo seancë testimi, pyetjet e përzgjedhura nga sistemi në mënyrë automatike janë të njëjta për të gjithë kandidatët pjesëmarrës.
2. Testimi zgjat 60 minuta dhe zhvillohet në një raund të vetëm. Ai fillon dhe mbaron njëkohësisht për të gjithë kandidatët pjesëmarrës në testim, në ditën dhe orarin e caktuar.
3. Vlerësimi i kandidatëve bëhet në mënyrë automatike nga sistemi kompjuterik në çastin e përfundimit të testimit. Rezultati përfundimtar i shfaqet kandidatit në monitor dhe printohet në mënyrë automatike nga sistemi së bashku me përgjigjet e dhëna. Çdo kandidat nënshkruan fletën me rezultatet e testimit të printuar në përfundim të testimit përkatës.
4. QSHA ka të drejtë që nëse rezulton shkelje të rënda të rregullave të provimit, t’u propozojë përfaqësuesve të MASR përjashtimin e kandidatit që thyen rregullat.
5. Nëse konstatohet se testimi nuk është zhvilluar sipas rregullave, testimi për kandidatët e asaj salle do të vlerësohet si jo i kryer. Vendimi në këtë rast është në kompetencë të QSHA- së dhe të përfaqësuesve të MASR.