Starova: Aleancat? Ne i druhemi vetëm gjykimit
Partizani luan në Durrës, Kukësi për 3 pikë ndaj Lushnjës
Do të luhen sot tri prej sfidave të javës së 23- të të Kategorisë Superiore.
Skuadra kryesuese, Skënderbeu, do të presë Laçin, e cila vjen pas fitores së arritur ndaj Vllaznisë. Kurbinasit ia dolën që në fazën e dytë t’u hapnin punë korçarëve dhe do të tentojnë diçka të tillë edhe në sfidën e sotme. Kukësi, për të harruar barazimin 22 ndaj Skënderbeut në ndeshjen e shkuar, do të tentojë të rikthehet te tri pikët në sfidën që ka me Lushnjën e vendit të fundit. Takimi tjetër që do të luhet sot, është përballja e Partizanit me Teutën në Durrës. Trajneri i Partizanit, Sulejman Starova, në konferencën para ndeshjes me Teutën, pohoi se ekipi i tij nuk ka problem aleancat, por gjykimet. Ai citoi sërish synimin e të kuqve, si dhe foli për gjendjen e ekipit, ndërsa e ardhmja e tij varet nga klubi. “Tani nuk ka kundërshtarë të lehtë. Teuta është ndërtuar për rezultate këtë vit. Ka mbështetje financiare. Ka pasur momente të mira, por ka pasur edhe luhatje. Mund të arrijë rezultat pozitiv me çdo skuadër në kampionat. Ndeshja është e fortë dhe e rëndësishme. Garanci është loja e mirë, jo goleada. Nëse skuadra do të vazhdojë me këtë ritëm, ka premisa për më lart. Objektivi ynë është Europa. Aleancat? U druhem vetëm gjyqtarëve. Nëse vazhdojnë të na gjykojnë mirë, do jemi mirë. Tani në Shqipëri dihet sesi funksionojnë aleancat. Të paktën gjykimit i druhem. Aleancat s’janë problem, ne e kemi te gjykimi. Shpresoj që të vazhdohet me gjykime të mira se kemi një kampionat me 10 ekipe ku ka konkurrencë të madhe, e cila prodhon progres dhe ne duhet ta ruajmë”, deklaroi Sulejman Starova.