Spaleti lëshon sfidën: Ky derbi vlen një sezon
Luçiano Spaleti nuk ka dyshime që Interi i tij do zhvillojë një derbi të madh, pavarësisht se ka gjithçka kundër. “Ndjenjat janë fantastike. Do shkojmë të luajmë ndeshjen më të bukur të kampionatit. Duam të përcaktojmë fatin tonë”, komentoi dje në konferencën për shtyp. Për t’ia dalë mbanë, ky Inter ka nevojë të jetë i vetëdijshëm për rëndësinë e një takimi të tillë. Ka shumë gjëra që kanë ndryshuar në krahasim me fazën e parë dhe Spaleti e shpjegon me faktin se: “Nëse kemi një pozicion të caktuar në renditje, kjo ndodh sepse kemi ditur të grumbullojmë pikë, sidomos ndaj të mëdhave. Duhet të jemi të zotët të lexojmë momentet e ndeshjes duke kërkuar përballjen me rivalin pa rënë pre e lojës së tyre. Nuk më shqetëson asnjëri prej rivalëve, thjesht shpresoj që të mitë të bëjnë detyrat. Milanin nuk e kam nënvlerësuar edhe kur ishte shumë larg nesh”.
Nga Ikardi te Gatuzo – Nga ulësja e psikologut tek ajo e trajnerit me Spaletin, që deklaroi: “Ikardi nuk është gati, por super gati. Një ndeshje e tillë jep stimuj nga ato më të fuqishmit. Kam ende disa dyshime, por Kanselo do të luajë si mbrojtës, ndërsa Karamoh do të jetë mes titullarëve. Edhe Miranda është në gjendje të luajë, ndërsa fizikisht më duhet të testoj Borha Valeron”. Ivan Perisiç ishte një temë më vete e fjalës së trajnerit zikaltër. Rënia e Interit përkon me uljen e rendimentit të kroat- it, për të cilin tekniku zikaltër tha: “Forma e tij është disi e lidhur me krizën e skuadrës. Ivani është një lojtar i fortë, të cilin do dëshiroja në çdo skuadër që do stërvis. Nesër ( sot) në mbrëmje do tregojë se është kthyer ai i mëparshmi”. Xhenaro Gatuzo mori gjithashtu një dozë komplimentesh nga homologu i derbit. “Edhe armiku më i madh nuk do e fshinte atë që ka bërë Rino: ka përdorur armët e tij me thjeshtësi, duke dhënë entuziazëm dhe grintë. Nuk e njoh profesionalisht, si person po. Është transparent. Një Milan në formë është gjithmonë gjithçka e bukur për futbollin. I bëj komplimentet e mia”, tha Spaleti.
Zërat — Fundi i konferencës shkoi i gjithë për thashethemet e shumta mbi bilancet, brirët mes shokësh dhe grindjeve në dhomat e zhveshjes. I prerë, por dhe shumë konciz komenti i Spaletit, i cili deklaroi: “Është e gabuar të kushtëzohet gjykimi i tifozëve. Këtu ka rregull, jo ashtu si thuhet jashtë. Interi është i organizuar dhe është kritikuar sepse ka qëndruar brenda rregullave. Drejtuesit kanë të drejtë të mbrohen, sepse nënkuptojnë se nuk duan të ndryshojnë mendimin e mijërave personave, që mbajnë në zemër pasionin për këtë fanellë.