Gatuzo: Interi më i fortë se Milani
“Për sa kohë janë mbi ne në renditje, janë ata favoritët”
“Dua një ekip të përulur, gati për të goditur”.
Është ky udhëzimi i Xhenaro Gatuzos në prag të derbit. Nuk ka vend për lodhje dhe justifikime me garën kundër Interit, që përfaqëson një betejë, e cila duhet fituar. Siç shpjegoi edhe trajneri kuqezi në konferencë për shtyp: “Si lojtar shfryhesha lehtësisht, ndërsa si trajner kam më shumë gjëra për të menduar. Djemve u kërkova të mos humbasin dhuntinë tonë kryesore, që është përulësia”.
Ekipi — Pas një komenti të shkurtër për kundërshtarin, vëmendja e Gatuzos kaloi te skuadra e tij, për të cilën tha: “Nuk duhet të kursehemi në asnjë aspekt. Duhet një ndeshje e madhe në nivel fizik dhe mendor. Kemi shpenzuar shumë në Kupë, është e vërtetë, por nuk dua të dëgjoj askënd të flasë për lodhje. Për derbin nuk kemi alibi”.
Pavarësisht momentit pozitiv, tifozët kanë gjetur disa shënjestra, një ndër të cilat është edhe Nikola Kaliniç. Gatuzo nuk lejon t’i prekin lojtarët dhe kundërsulmoi: “Nikola është një sulmues i vërtetë dhe punon shumë për skuadrën. Kaliniç, ashtu si edhe ndonjë tjetër, ka shumë vlera dhe me siguri do të luajë përsëri. Jam i ndershëm me të gjithë, finalen e Kupës e doja edhe për të sepse nëse nuk kualifikoheshim, druaja se do ta humbnim psikologjikisht deri në fund të sezonit”.
E kaluara — Historia flet për derbi të fituar shpesh nga ekipi që paraqitej me më shumë vështirësi. Diçka e tillë ndodhte edhe me Milanin, por në Kupë gjithçka ndryshoi. Gatuzo e njeh më mirë se të gjithë ecurinë e një derbi, ndaj në fjalën e tij shpjegoi: “Në derbin e Kupës ishim një hap larg gijotinës, por ja që për ne rezultoi ndeshja e kthesës. Interi ka shtatë pikë avantazh ndaj nesh dhe renditja thotë se janë më të fortë se ne”. Duke u kredhur edhe më thellë në historinë e ndeshjeve derbi, Gatuzo nuk humbi rastin për të folur për një temë shumë të dashur për të. “Kam jetuar 14 vite në dhomën e zhveshjes së Milanit, ku kanë kaluar me qindra kampionë. Ndryshimin e bëjnë karakteret dhe jo atletët. Për mua, aktualisht, është e domos- doshme t’u bëj djemve të kuptojnë sensin e përkatësisë ndaj kësaj fanelle, respektin e rregullave dhe bukurinë e të qëndruarit në skuadër. Mua te Milani më dukej vetja si në shtëpi, shpresoj shumë t’ia transmetoj ekipit këtë ndjesi”, deklaroi trajneri.