Shehi: Zhvillim pozitiv, politikën s’e përfaqësojnë vetëm kryetarët e partive
Kreu i LZHK- së dhe një nga bashkëthemeluesit e PD- së, Dashamir Shehi, e sheh si pozitive lëvizjen e re të nisur brenda Partisë Demokratike nga ish- funksionarë të saj. Në një prononcim për “Panorama”, Shehi thekson se është e drejtë legjitime e çdokujt të bëjë lëvizjet e tij politike, por kryesore është përcaktimi i kundërshtarit ndaj të cilit e ke betejën politike. “Unë gjykoj që gjithsecili ka të drejtë të bëjë lëvizjet e tij, këtë e them edhe nga eksperienca ime që para 20 vitesh bashkë me disa të tjerë krijuam një grupim të ri politik. Unë do të dëshiroja të shihja një propozim real politik, jo thjesht deklarata televizionesh.
Unë kam një princip që çdo gjë që bëhet brenda të djathtës dhe opozitës në luftë me qeverinë “Rama”, unë e quaj kontribut dhe zgjerim të hartës opozitare. Kjo do të ishte pozitive”, deklaron Shehi. Kreu i LZHK- së kujton edhe rastin e largimit të tij nga Partia Demokratike, duke nënvizuar faktin se pavarësisht largimit nga forca që bashkëthemeloi, ka qëndruar gjithmonë pjesë e së djathtës shqiptare. “Unë jam një njeri që kam bërë 20 vite disidencë, por gjithmonë kam qenë brenda të djathtës. Shpresojmë që kjo të jetë vazhdim i kontributit të disa njerëzve, që kanë vlerat e veta në jetën politike shqiptare. Politikën nuk mund ta përfaqësoj vetëm një njeri apo një grup njerëzish rreth tij, që janë kryetarët. Kështu do të varfërohej politika. Nëse pozicioni i tyre është puro opozitar edhe nëse është jashtë PD- së, unë e konsideroj një shenjë të kontributit. Pastaj fuqinë reale çdo individ apo forcë politike e mat në zgjedhje. Duhet të kuptojmë diçka pas kaq shumë vitesh. Ne nuk na ndan raporti me njëri- tjetrin, ne duhet të na ndajë raporti me kundërshtarin. Kush është kundër Ramës dhe grupit që qeveris sot vendin, potencialisht është edhe aleati ynë”, sqaron për “Panorama” Shehi.