Mbrojtja e hebrenjve, Rama dekorohet në Shtëpinë e Bardhë
Çmimi për Pluralizmin Kulturor, dorëzuar nga i emëruari i Trump
Kryeministri Edi Rama është nderuar dje në Shtëpinë e Bardhë në Uashington me çmimin e Pluralizmit Kulturor, vlerësim që iu dorëzua nga përfaqësuesi i Presidentit Donald Trump.
Gjatë vizitës së tij në Uashington, ku mori pjesë në Konferencën Vjetore të Komitetit izraelito- amerikan të Çështjeve Publike, fjala e Ramës për rolin e popullit shqiptar në mbrojtje të hebrenjve gjatë Luftës së Dytë Botërore është vlerësuar nga të pranishmit. Për këtë arsye, Paul Packer, kryetar i Komisionit për Mbrojtjen e Trashëgimisë Amerikane në Botë i ka dorëzuar vlerësimin Kryeministrit shqiptar për angazhimin dhe ruajtjen e kujtesës së Holokaustit dhe mbrojtjen e së vërtetës historike. Rama këtë vlerësim e ka përcjell nëpërmjet një mesazhi në “Facebook”, teksa e ka quajtur si një surprizë të vërtetë. “Një surprizë e posaçme ceremonia e marrjes sot, në Shtëpinë e Bardhë, të Çmimit për Pluralizmin Kulturor, dorëzuar nga i emëruari i Presidentit Trump në krye të Komisionit për Mbrojtjen e Trashëgimisë Amerikane në Botë, Paul Packer. Çmimi për angazhimin në ruajtjen e kujtesës së Holokaustit dhe mbrojtjen e së vërtetës historike, një nder shumë i veçantë për mua, qeverinë tonë dhe padiskutim Shqipërinë, që rrezaton gjithnjë e kudo me shembullin e saj të mbrojtjes së popullit hebre gjatë orëve të zeza të Luftës së Dytë Botërore”, shkruan kryeministri.
FJALIMI Në fjalën e tij para mijëra të ftuarve në panelin e Konferencës Vjetore AIPAC, Edi Rama ka rrëfyer për rolin e shqiptarëve gjatë Luftës së Dytë Botërore, të cilët, sipas tij, i dorëzuan nazistëve florinjtë, por jo hebrenjtë. “Është shumë e famshme historia e njërit prej klerikëve më të lartë të krishterë në Shqipëri, që pagëzoi shumë hebrenj që të ndryshonte iden- titetin e tyre e t’i mbronte nga nazistët. Kemi gjithashtu një episod interesant në të njëjtën kohë, ku një prej nazistëve më të lartë, Hermann Neubacher, në vitin 1943 thirri katër përfaqësues të katër komiteteve tona fetare e ju kërkoi që të jepnin listën e hebrenjve dhe listën e floririt që kishin. Ata dhanë listën e floririt, por jo listën e hebrenjve. Është një pyetje vërtetë e jashtëzakonshme sesi ka ndodhur që asnjë hebre nuk iu dorëzua gjermanëve nga shqiptarët, qofshin ata myslimanë apo katolikë, por po ashtu është një leksion i shkëlqyer i historisë sonë dhe kjo është ajo, pse unë besoj fort se nuk duhet ta marrim të mirëqenë, por duhet të bëjmë gjithçka mun- demi që për fëmijët tanë dhe fëmijët e fëmijëve tanë, ky të mbetet një thesar, i cili duhet mbrojtur fort e që duhet të shërbejë si frymëzim për të ardhmen”, ka thënë Rama.