Trafiku i 613 kg kokainë, rihapet dosja e 2015- ës
Ministri kolumbian: Operacion i përbashkët me Policinë shqiptare
Dosja e tentativës së trafikimit të 90 kg kokainë nga Ekuadori në vitin 2015, që mbeti pezull në Prokurorinë e Krimeve të Rënda, tashmë është rihapur duke iu bashkëngjitur procedimit të datës 28 shkurt, në ngarkim të Arbër Çekajt.
Sekuestrimi i sasisë rekord të kokainës, të mbërritur me kontenierin me banane të “Arbri Garden”, nga Kolumbia në Portin e Durrësit, ka bërë që grupi hetimor t’i rikthehet hetimeve që kishin nisur më 22 dhjetor 2015. Burime nga organi i Akuzës thanë se në lidhje me procedimin e mëparshëm, Çekaj ishte thirrur për t’u marrë në pyetje te Krimet e Rënda, por hetimet mbetën pezull, në pritje të përgjigjes nga autoritetet e Ekuadorit. Pavarësisht se ishin nisur 2 letërporosi drejt Ekuadorit, Prokuroria shqiptare nuk mori asnjë përgjigje në interes të hetimeve të nisura për “trafikim ndërkombëtar të lëndëve narkotike”. Kjo ishte arsyeja që 38- vjeçari Arbër Çekaj vijoi i lirë aktivitetin e tij, në pamundësi për të provuar përfshirjen e tij në rastin e trafikimit, që u parandalua që në vendin e origjinës.
PROCEDIMI
Arbër Çekaj, pronari i ngarkesës me banane ku u zbulua 613 kg kokainë, është hetuar edhe rreth 2 vite më parë, si i dyshuar për përfshirjen në trafikimin e kokainës. Sipas burimeve nga Policia e Shtetit, mësohet se në dhjetor të vitit 2015, kompanisë “Arbri Garden” të Arbër Çekajt i janë kapur 90 kilogram kokainë në Ekuador. Për këtë rast, Policia pati referuar materialet në Prokurorinë e Krimeve të Rënda më datë 22 dhjetor 2015, me numër protokolli 12041 dhe 12041/ 1. Ndërsa në janar të vitit 2016, pas referimit të materialeve, Çekaj është shoqëruar me iniciativën e Policisë për të dhënë deklarimet në lidhje me këtë rast trafikimi, që në fakt ishte parandaluar që në vendin e origjinës. Megjithatë, hetimet për këtë rast zgjatën vetëm disa muaj dhe më pas çështja mbeti pezull në Prokurorinë e Krimeve të Rënda, ku dosja u arkivua. Por pas zbulimit të 613 kg kokainë, në magazinat e kompanisë së tij në Maminas, që kësaj here kishte ardhur nga Kolumbia, dosja e dy viteve më parë është hapur duke iu bashkuar procedimit të fundit, për të cilin Arbër Çekaj është shpallur në kërkim. Për kokainën e kapur disa ditë më parë janë arrestuar menaxheri i kompanisë dhe shoferi. Vetë pronari i ngarkesës me banane, deklaroi disa ditë më parë se do të vinte në Shqipëri që të përballej me drejtësinë, por deri tani ende nuk është kthyer nga Gjermania, ku deklaroi se ndodhej.
MINISTRI KOLUMBIAN
Sipas ministrit kolumbian të Mbrojtjes, Luis Carlos Villegas, sasia e konsiderueshme e kokainës e kapur në Shqipëri i përkiste organizatës kriminale kolumbiane “Clan del Golfo”. Ndërsa theksoi se në operacion morën pjesë Armada Kombëtare e Kolumbisë, agjencitë ndërkombëtare dhe Policia shqiptare. Ai ishte i pranishëm në Bazën Kundër Trafikut të Narkotikëve në Policinë e Shtetit Kolumbian ku u shpreh se: “Ushtria Kombëtare e Kolumbisë kishte informuar tashmë se gjatë një operacioni të përbashkët me agjencitë ndërkombëtare u kapën 613 kg kokainë e bandës kriminale ‘ Clan del golfo’, në Portin e Durrësit, në Republikën e Shqipërisë”. Sipas ministrit kolumbian, “Clan del Golfo” ka kontakte në disa porte të Europës ku dërgon ngarkesa droge. Ai tha se kjo organizatë ka humbur nga 2014 rreth 6 miliardë dollarë.