LSI bashkohet me PS për vetingun e policëve
Miratohet komisioni hetimor për Tahirin, do thirret edhe Rama
Maxhoranca dhe opozita kanë votuar me konsensus vendimin për ngritjen e një komisioni hetimor parlamentar në lidhje me veprimet dhe mosveprimet e institucioneve shtetërore për kultivimin e lëndëve narkotike, përfshi këtu rastin për të cilin Prokuroria po heton, ish- ministrin e Brendshëm, Saimir Tahiri. Me 121 vota pro, Kuvendi pranoi kërkesën e opozitës për të hetuar përgjegjësinë e institucioneve shqiptare për kanabizimin e vendit dhe mbrojtjen që, sipas opozitës, maxhoranca dha në hetimin e ish- ministrit Tahiri. Komisioni do të drejtohet nga nënkryetari i PD, Edi Paloka. Drejtuesja e Komisionit të Sigurisë, Ermonela Felaj, është përcaktuar nga PS si nënkryetare e këtij komisioni. Opozita ka vendosur të përfaqësohet në komision edhe me deputetët demokratë Enkelejd Alibeaj, Flamur Noka dhe Myslim Murrizi. LSI në komision do të përfaqësohet me deputetin Endrit Brahimllari. Po dje, PS dhe LSI kanë bashkuar votat duke miratuar me 88 vota pro, ligjin e vetingut në Policinë e Shtetit, ndërkohë që PD ka votuar abstenim.
DEBATI Deputeti dhe anëtari i komisionit hetimor, Enkelejd Alibeaj, deklaroi se përfundimi dhe sjellja e socialistëve në këtë komision është e qartë por për publikun do të ketë rëndësi zbardhja e së vërtetës. Alibeaj paralajmëroi edhe thirrjen e Kryeministrit Rama në komisionin hetimor parlamentar. “Dihet se çfarë do të bëni ju në komisionin hetimor. Por e vërteta është ajo që ka interes për publikun. E hidhur do të jetë. Meqë ishte një histori me “partizanë”. Ajo çfarë unë besoj se duhet t’i bëhet një pyetje juve dhe publikut është: Ore, ky komandanti i partizanëve, mos është njëri, i cili mban herë pas here një yll të kuq dhe herë një yll të zi të krimit? Edhe ai do të thirret në komisionin hetimor”, tha Alibeaj. Në përgjigje të akuzave, kreu i Grupit Parlamentar të PS, Taulant Balla paralajmëroi demokratët se përfundimi i komisionit hetimor do të nxjerrë përgjegjësit kryesorë të kanalizimit të vendit në këto 27 vite. “Ne mezi po presim ta ngremë këtë komision hetimor parlamentar. Ne jemi gati të bëjmë një skaner të plotë 27 viteve të kanabisit në Shqipëri. Ky komision të quhet komisioni i historisë së kanabisit në Shqipëri. Të dalin fajtorët e vërtetë të një historie, që unë jam shumë i sigurt që do të ketë ndokënd në këtë sallë që s’do jetë shumë i gëzuar nga raporti përfundimtar”, deklaroi Balla.