Presidenti nderon Vrenozin me “Dekoratën e Artë të Shqiponjës”
Presidenti Ilir Meta ka dekoruar pas vdekjes me “Dekoratën e Artë të Shqiponjës”, 54- vjeçarin Agur Vrenozi, për aktin e tij heroik në tentativën për të parandaluar grabitjen e ndodhur në qytetin e Fierit, më 2 mars. Në një njoftim të shpërndarë nga Presidenca thuhet se, dekorata vjen për aktin e tij vetëmohues në mbrojtje të jetës së bashkëqytetarëve, duke e cilësuar këtë si veprim sublim. “Presidenti i Republikës, Ilir Meta, i akordoi sot, më 5 mars 2018, me numër dekreti 10736 Agur Vrenozit ( pas vdekjes) “Dekoratën e Artë të Shqiponjës” për aktin e tij vetëmohues në mbrojtje të jetës së bashkëqytetarëve; për veprimin heroik e sublim, frymëzues për mbarë shoqërinë për të reaguar në përballjen me dhunën, krimin e rrezikun për jetën, paqen sociale, pronën e sigurinë qytetare”, thuhet në njoftim e Presidencës. Vrenozi u qëllua me plumb në kokë gjatë grabitjes së pikës së këmbimit valutor në Fier, ku tre persona me maska dhe të armatosur hynë në “Exchange”- in e Gëzim Hoxhës. Dy ditë më parë, këshilltari i Presidentit, Ylli Asllanit, i ka shprehur solidaritetin e tij familjes së Agur Vrenozit dhe shtoi se, shteti shqiptar do të mbështesë dhe do t’u gjendet pranë gjithmonë fëmijëve dhe familjarëve të tij. Ndërsa një ditë pas përcjelljes për në banesën e fundit të Agur Vrenozit, këshilltarët e Partisë Demokratike në Bashkinë Fier, përmes deputetit Luan Baçi, kanë kërkuar që heroi i qytetit, që sipas tyre u bë modeli i sakrificës për të mbrojtur të tjerët, të shpallet “Qytetar Nderi”.