DEBATI NË PARLAMENT
Lulzim Basha: Kush e ka financuar një operacion të tillë? A mund të kryhej një operacion i tillë, pa garancitë më të larta politike. Kush ka premtuar mbulim dhe ka garantuar siguri për një operacion të tillë? Reagimi i parë i Fatmir Xhafës në “Tëitter” ishte përgëzimi i Policisë dhe partnerëve të huaj për bashkëpunimin. Pas një heshtje të gjatë foli edhe Edi Rama, i cili na tha diçka krejt të kundërt. Rama, i cili na tha diçka krejt të kundërt. U mburr duke thënë se operacioni u krye ekskluzivisht nga Policia shqiptare pa asnjë lloj sinjalizimi nga partnerët ndërkombëtarë. Përgënjeshtroi Xhafën. Pas disa orësh, në mbrëmje Xhafaj i ra hasha deklaratës së mëngjesit duke thënë atë që as vetë se beson: “Që partnerët ndërkombëtarë i falënderova në mëngjes për bashkëpunimin me Policinë Shqiptare, por se kisha fjalën për bashkëpunimin, por për bashkëpunimin që do të vijë pasi kryem operacionin”.
Fatmir Xhafaj: Ndihem krenar të pohoj me përgjegjësi të plotë se një operacion i tillë, suksesi i të cilit provon qartë gatishmërinë dhe eficencën profesionale të organeve ligjzbatuese shqiptare, është një produkt i koordinimit të shkëlqyer mes institucioneve tona ligjzbatuese. Ishte meritë ekskluzive e tyre identifikimi dhe zbulimi i kësaj sasie të jashtëzakonshme kokaine pa pasur asnjë lloj informacioni paraprak të jashtëm. E ritheksoj, pa pasur asnjë lloj informacioni paraprak të jashtëm, por bazuar vetëm në informacionet, analizën dhe kontrollin e kryer prej tyre.
Ashtu sikundër kam vlerësuar qysh në momentet e para dhe në vazhdim, bashkëpunimin me partnerët ndërkombëtarë për identifikimin dhe zbulimin e autorëve të këtij trafiku, të cilët shpresoj se shumë shpejt do të jenë përpara përgjegjësisë së ligjit, falë edhe këtij bashkëpunimi.
Sali Berisha: Po pse them unë Olsi Rama? Sepse, njëlloj si Saimir Trafiku, veproi në Durrës Fatzi Xhafa, i cili me urdhër të Ramës prishi provat, bllokoi hetimin, shkatërroi procesin ku të gjitha fijet të çonin vetëm në një drejtim; Edvin dhe Olsi Rama. Fatzi Xhafa u deklaroi në mëngjes shqiptarëve se kryem një operacionin në bashkëpunim ndërkombëtarë. Çfarë ndodhi më vonë? Pas një mbledhje që u bë në Kryeministri, Edi Rama heshti deri në atë moment, pas mbledhjes doli dhe u tha shqiptarëve se ky operacion u krye vetëm nga Policia shqiptare dhe Dogana shqiptare dhe se nuk dinim gjë po ashtu... jo ishte si ajo përralla “më jep kanarin, po mos kujto se po peshoj paratë”. Edhe ky ( Rama) u thoshte shqiptarëve mos kujtoni se droga është e imja. Menjëherë nxori Fatzi Xhafën të thotë tjetër në mëngjes e tjetër në drekë. Ishte esëll në mëngjes, apo ishte i dehur?
Taulant Balla: Ikni tani, e bëtë edhe detyrimin e sotëm për të ndotur imazhin e Shqipërisë! Megjithëse sot, Kuvendi i Shqipërisë është në një ditë ku me konsensus do të ngremë një Komision Hetimor për të ndarë mirë njëherë e përgjithmonë shapin nga sheqeri, për sa i përket kësaj historisë së trafikimit të lëndëve narkotike, se kush e futi kanabisin në Shqipëri, se kush e mbështeti politikisht kanabisin në Shqipëri, se kush ka përfituar vota nga kanabisi në Shqipëri, dhe ku jemi...
Sali Berisha: Taulant Balla mund të përdorë mbiemrat që vijojnë. Taulant Gjura, sepse me pasaportë diplomatike kaloi Fatos Gjurën, 1 nga narkotrafikatët kryesorë të Librazhdit në kufirin midis Shqipërisë dhe Maqedonisë, i verifikuar me Tims dhe çdo dokument. Tulant Gjura mund të quhet Taulant Hoxha, kësaj here jo se këndonte këngë për Enverin, por se ishte ushtar i bindur i fisit Hoxha. Një prej të cilit u ekstradua, një u vra në Kryeministri në zyrë, kurse tjetri u ekstradua në Itali. Taulant Hoxha mund të quhet dhe si trajneri i klubit sport të Librazhdit, e arrestuan te “Tri urat” me shoferin e Taulant Gjurës, ose Ballës. Në qoftë se ka njeri këtu me histori këmbë e kokë drogë, është pikërisht Taulant Gjura, Taulant Hoxha dhe Taulant trajneri...( deputetët qeshin) Taulant Balla: Shyqyr që të kemi, se na kënaqe... Lulzim Basha: Cilat janë faktet që Edi Rama, Fatmir Xhafa dhe të tjerë aksionarë dhe aksionerë të kokainës mundohen t’i fshehin me çdo kusht dhe me çdo çmim? Më 28 shkurt u arrestuan në Maminas dy persona, një shofer dhe një hamall, që po transportonin një kontenier me banane nga Kolumbia në dyshemenë e të cilit u gjetën afro 620 kilogramë kokainë. Policia deklaroi se vlera e kokainës ishte 180 milionë euro. Ky kontenier i ardhur në emër të kompanisë “Arbri Garden” kishte qëndruar në portin e Durrësit që prej datës 19 shkurt, pra, plot 9 ditë në pritje të zhdoganimit, bashkë me dy kontenierë të tjerë, po kështu në emër të kësaj kompanie dhe të kompanive të tjera që importonin fruta ekzotike. Një kërkim i thjeshtë, i publikuar nga opozita dhe nga mediat, tregoi se kjo kompani “Arbri Garden”, ka bërë 97 ngarkesa nga Kolumbia, 97! Ky pronar, është shpallur në kërkim. Është larguar më 27 shkurt. 24 orë para se droga e tij të ndalohej.
Taulant Balla: Zotëria që sapo foli, mund të jetë një ndër përfituesit e projektit për arsimin profesional, e duhet ta bëjmë një me CDU- në gjermane për ta bërë kryetar partie të paktën.
Edmond Spaho: Merru me drogën, fol për Saimir Tahirin.. Fatmir Xhafaj: Shpresoj që në ditët në vijim Prokuroria e Krimeve të Rënda, përgjegjëse për këtë hetim t’ju japë zgjidhje gjithë pyetjeve të ngritura këto ditë nga kureshtarët e kronikave të tilla, si dhe nga lloj- lloj abuzuesish politikë dhe mediatikë dhe të vendosë para përgjegjësisë të gjithë ata, që qëndrojnë prapa kësaj veprimtarie kriminale. Ju të tjerët, spekulantë të fjalës së lirë keni vetëm një detyrë, të lini të qetë organin e Prokurorisë dhe Policinë e Shtetit të bëjnë detyrën konform Kushtetutës dhe ligjit...
Arben Ahmetaj: Debati, që të japë dorëheqje qeveria dhe të vijë një qeveri antimafia, e të japë dorëheqje ministri i Brendshëm se kapi 600 kg e ca kusur drogë kokainë. Ky nuk është diskutim që vlen. Të japë dorëheqje, pse kapi drogën? Po pastaj të japë dorëheqjen, pse nuk u kap? U kap, arritje e madhe e përbashkët me institucionet tona, po të doni me institucionet ndërkombëtare. Ç’rëndësi ka. Shteti funksionoi patjetër. Pastaj, ka institucione, nuk është ky institucion që bën diskutim kush e pati. Të pyesni ditë për ditë për këtë
çështje. Po ua them, ky është mendimi im personal se recitimi, ‘ droga’ ‘ kanabis’ nuk e çojnë opozitën asgjëkundi.
Lulzim Basha: Asnjë gjemb në këmbë, 97 herë dhe u kap vetëm kur partnerët që e sinjalizuan dhe që kanë konfirmuar sinjalizimin që nga armata kolumbiane tek autoritetet doganore dhe Guardia di Finanza dhe agjenci të tjera bashkëpunimi kundër narkotikëve, euroatlantike, europiane dhe amerikane, vetëm pasi ia futën dy këmbët në këpucë, njësoj si në rastin e Xibrakës, u detyruan të kapin dhe të deklarojnë sasinë e kokainës, por vetëm pasi siguruan që çdokush që mund të tregonte gjurmët, çdokush që mund të çonte në lidhjet e drejtpërdrejta me kupolën qeveritare, të ishte jashtë dhe larg duarve të organeve të drejtësisë.
Taulant Balla: E kam pritur më shumë dëshirë që ta ngrinim një Komision Hetimor për këtë çështje, por ti Lulzim nuk kishe pse nxitoheshe që të bëje këtë diskutim, të njëjtin që ke 5 vjet që e bën; por ta bëje te momenti që do diskutojmë në Komisionin Hetimor.
Lulzim Basha: Është e njëjta skemë që kupola qeveritare me Edi Ramën në krye; ta thjeshtojmë pak, Edi Rama dhe Fatmir Xhafaj kanë zbatuar të njëjtën skemë që zbatoi Edi Rama dhe Saimir Tahiri në rastin e Xibrakës. E njëjta skemë, kapet shoferi, kapet hamalli. Njësoj si në rastin e Xibrakës operatorët kryesorë ia mbathin, ata që mund të tregojnë bosët e vërtetë ia mbathin. Mbetemi me një shofer, i cili na thotë se malli është për partizanët. Për partizanët nuk e dimë nëse e ka fjalën për pasardhësit, trashëgimtarët e komunistëve, apo e ka fjalën për ndonjë ekip futbolli me vëllain e Kryeministrit, drejtor. Jo, nuk e dimë.
Sali Berisha: Ja ku janë partizanët ( tregon me gisht nga ministrat e qeverisë).
Taulant Balla: Policia e Shtetit meriton të gjithë vlerësimin për operacionin e fundit të kryer në Maminas. Shtetet e Bashkuara të Amerikës, Bashkimi Europian dhe çdo agjenci tjetër e ka përshëndetur. E habitshme se si ka mundësi që të vetmit që nuk përshëndesin Policinë e Shtetit jeni ju, juve që ju intereson që këtë politikë ta mbani si çamçakëz në gojë se s’keni gjë tjetër...