Basha i përgjigjet Patozit: Bashkimi në Kuvendin e PD
Ish- deputetët u fotografuan në kafe me Aqif Rakipin, kreu i PD: Duhet distancim nga personat me rekorde kriminale
Kryetari i Partisë Demokratike, Lulzim Basha, ka paralajmëruar se për lidershipin e ri të partisë së tij nuk do të zhvillojë negociata personale me askënd prej anëtarëve të PD- së, pavarësisht kontributeve që gjithsecili ka.
Deklaratat e ish- nënkryetarëve të PD- së, Astrit Patozit dhe Jozefina Topallit, për shpërfillje të propozimeve statusore, Basha i ka cilësuar pretekste dhe deklarata kafenesh. Në një deklaratë për mediat, Basha tregoi derën e PD- së për çdo demokrat që kërkon të investohet dhe të kontribuojë që demokratët të vijnë në pushtet. “Është e drejtë e çdokujt të bëjë zgjedhjen e tij politike. Absolutisht e çdokujt. Pretendimi se propozimet nuk janë shqyrtuar nga kryetari, janë pretekst. Nuk është kryetari ai që shqyrton propozimet, janë forumet, është Kuvendi i partisë. Kryetari as nuk shqyrton, as miraton, as nuk hedh poshtë, por kryetari vetë propozon dhe ka vizionin e tij për ndërtimin, fuqizimin e punës në Partinë Demokratike. Unë i di shumë mirë përgjegjësitë e mia dhe unë besoj se çdo demokrat nuk pret që procesi i bashkimit të partisë do të jetë një proces negociatash personale të kryetarit, por të jetë krijimi i një hapësire, ku çdokush që ndan këto vlera dhe që është gati të kontribuojë, pavarësisht nëse ka 27 vite që kontribuon apo do të vijë sot në këtë parti popullore, që i bashkon liria, demokracia dhe Shqipëria, si gjithë Europa, të ketë mundësi që zëri i tij apo i saj të dëgjohet”, tha Basha.
DISTANCIMI Duke mos folur me emra konkretë, Basha u bëri thirrje kundërshtarëve të tij brenda partisë që të distancohen nga persona me rekorde kriminale. Kjo kërkesë e Bashës erdhi një ditë pasi ish- nënkryetari i PD- së, Astrit Patozi dhe ishsekretari i Përgjithshëm i PDsë, Ridvan Bode, u fotografuan në një lokal në kryeqytet me ish- deputetin e PDIU- së, Aqif Rakipin, të cilit iu hoq mandati për shkak se u prek nga ligji i dekriminalizimit. Si për të theksuar denoncimin e tij për këtë rast, Basha u kërkoi kundërshtarëve të tij brenda partisë t’i lënë sulmet personale nga kafenetë dhe të vijnë e të kontribuojnë në PD. “Çdokush është i ftuar, gjatë gjithë procesit të analizës që ka marrë pjesë dhe do të vazhdojë të ketë hapësirën të japë propozimet për fuqizimin dhe mënyrën e organizimit të aksionit tonë politik dhe Partisë Demokratike. Sulmet ndaj kryetarit nuk janë ide politike. As sulmet ndaj Partisë Demokratike në media nuk u shërbejnë demokratëve, të cilët përballen ditë për ditë me krimin në pushtet, me revanshin e drogës, me varfërinë, me papunësinë, me largimin abuziv nga puna, me largimin nga skemat e ndihmës ekonomike. Nuk mendoj se vlejnë, as sulmet personale nga kafenetë, as deklaratat e pabazuara. Unë i bëj ftesë çdokujt që bashkohet rreth këtyre vlerave dhe kjo për mua është themelore. Lufta kundër krimit, dekriminalizimi, si një luftë që e kemi nisur, distancimi nga personat me rekorde kriminale, bashkëpunëtorë dhe autorë të trafikut të drogës dhe unë ftoj këdo që bashkohet rreth këtyre vlerave dhe të bashkohet rreth këtyre vlerave, në një proces të hapur modern dhe europian, nga e cila Partia Demokratike do të ndërtojë alternativën jo thjesht të pushtetit për nesër, por alternativën e një transformimi të madh politik dhe pastaj ekonomik të vendit. E vetmja ftesë është, distancim total nga personat me rekorde kriminale dhe përqafimi i kauzave të drejta që kemi luftuar për shqiptarët, jo për veten apo pushtetin tonë; dekriminalizimi, lufta kundër krimit, lufta kundër drogës dhe çlirimin e ekonomisë nga monopolet”, deklaroi kreu i PD- së.