Meta, dyshime për kreun e ri: SHISH më aktiv në kohën e Visho Ajazit
“Shqetësim kokaina nga Kolumbia”
Patjetër që aksioni është pozitiv, por edhe kuraja për të nisur ngarkesë të tillë drejt Shqipërisë është shqetësuese. Do të thotë që, luftë këtij fenomeni dhe kundër këtyre grupeve kriminale dhe që duket që janë forcuar ndjeshëm dhe ky është një shqetësim edhe i partnerëve tanë ndërkombëtarë
Presidenti i Republikës, Ilir Meta, tha dje se ai do ta japë autorizimin për të nisur negociatat për çështjen e detit me Greqinë, por vetëm kur të bindet se po krijohet një platformë e qartë negocimi. I ftuar në emisionin “Real Story” në Vizion+ të gazetarit Sokol Balla, Meta tha dje se marrëveshja me Greqinë duhet të mbyllet njëherë e mirë.
Ai tha se është në komunikim të vazhdueshëm me Ministrinë e Jashtme, ndërkohë që takimin me Ramën e ka quajtur “tepër bashkëpunues”, lidhur me çështjen e detit. Dje, Presidenti foli dhe për dekretin e kreut të SHISH, teksa tha se në kohën e Visho Ajazit ky institucion ka qenë më bashkëpunues dhe larg ndikimit politik.
Zoti Meta, në vërejtjet tuaja, ju i keni qëndruar totalisht analizës së vendimit, sepse m’u duk sikur ishte shumë profesionale, do të thosha unë, si oponencë që ju i bënit. Ndërkohë, ajo dukej sikur shkonte përtej kësaj.
Nuk shkon përtej, për arsye se vendimi i Gjykatës Kushtetuese është shumë konkret. Është shumë i thelluar, i studiuar, mendoj unë dhe çdo çështje ka të bëjë jo vetëm me anën formale, por ka të bëjë edhe me përmbajtjen, me platformën e negocimit, mbi të cilën pala shqiptare niset për ta zgjidhur këtë problem me palën tjetër. Dhe unë besoj që gjatë këtyre javëve është bërë një punë shumë e mirë, për të arritur drejt këtij momenti që nuk besoj se jemi shumë larg, për të filluar punën ekipi negociator me një platformë të qartë e solide që të garantojmë një marrëveshje sa më të drejtë.
Pra, ju po lini të kuptohet, që do t’ia jepni autorizimin ministrit të Jashtëm?
Nuk besoj se kam lënë të kuptohet ndonjëherë, që nuk do të jap autorizimin...
Jo, jo, dakord, por pas letrës së dytë dhe me sa jam informuar unë, ju tashmë e keni marrë edhe një përgjigje të letrës së dytë nga Ministria e Jashtme.
Ajo që mund të them është që është një komunikim i vazhdueshëm mes Presidencës dhe ekipit, që po merret me përgatitjen dhe formalizimin e këtij procesi, me Ministrinë e Jashtme, me Kryeministrinë. Dhe ky është një proces që vazhdon edhe tani kur po flasim bashkë dhe në çdo moment që konsiderohet i përmbyllur plotësisht, padyshim, jam shumë i predispozuar për t’i hapur rrugë këtij procesi, por njëkohësisht për të treguar përgjegjësinë maksimale, sepse jo vetëm duhet të autorizoj nisjen e këtyre negociatave që i ka kërkuar qeveria, por duhet që në vijimësi të ndjek këtë proces dhe do t’i duhet të shprehet përsëri para nënshkrimit të marrëveshjes dhe do t’i duhet të shprehet përsëri pasi Parlamenti të shprehet, përmes procesit të dekretimit. Pra, është një përgjegjësi e vazhdueshme. Jo vetëm që është një marrëveshje shtetërore, pra, nuk është thjesht një marrëveshje qeveritare, por është një marrëveshje e jashtëzakonshme, pra, duhet vlerësuar... Shumë sensitive. Nuk ka këtu një problem të veçantë në marrëdhëniet e Presidentit me qeverinë, por është diçka tjetër, që po përpiqet të bëjë detyrën e vet me përgjegjshmërinë maksimale.
A keni pasur ju shqetësimin që këto negociata, para ndërhyrjes suaj, po favorizonin Greqinë?
Nuk ka asnjë arsye që të ndikohem nga deklarata, komente apo luftëra politike që në raste të tilla ka edhe akuza, ka edhe interpretime të ndryshme. Nuk besoj se qeveria ka një interes të favorizojë Greqinë, sepse është qeveria e Shqipërisë...
Marrëveshja e mëparshme kështu është interpretuar, apo jo?
Absolutisht! Kalojmë më pas aty, vazhdojmë me marrëveshjen aktuale. Duhet të kemi parasysh edhe një gjë: që qeveria ka edhe shumë punë të tjera. Në këtë rast Presidenti, te kjo çështje, duke qenë se ai ka një përgjegjësi të veçantë, është i detyruar t’i kushtojë një rëndësi çdo detaji, sepse jo më kot Gjykata Kushtetuese është marrë me shumë detaje, me saktësime termash. Çdo detaj ka të bëjë me pozitën negociuese të palës shqiptare me palën tjetër. Çdo detaj shpreh një argument më shumë apo një argument më pak. Pastaj, më pas, një marrëveshje nuk mund të jetë kurrë e njëanshme. Njëra palë nuk mundet kurrë t’i imponohet tjetrës, por duhet patjetër që të arrihet një kompromis, në përputhje me të drejtën ndërkombëtare, me konventat ndërkombëtare, në përputhjes me ligjet e secilit vend, por është detyra ime të kujdesem si President për një pozitë sa më të mirë të ekipit negociator në këtë proces. Ndërkohë, të mos harrojmë që qeveria ka edhe njëqind probleme të tjera. Përfshirë edhe zotin Bushati, që është deputet i Shkodrës. Ka edhe shumë çështje të tjera, të cilat i vendosin nën presione nga më të ndryshmet. Sigurisht që ka edhe dëshirën ta përfundojë edhe këtë çështje sa më shpejt dhe beson se është në pozitat e duhura për të mbyllur një marrëveshje sa më të mirë, por kjo kurrsesi nuk më vendos mua në një pozitë që të mos jem i kujdesshëm dhe i përgjegjshëm në çdo hap gjatë këtij procesi.
Pra, ju i thoni Ministrisë së Jashtme, përse nuk keni marrë parasysh këtë vlerësim, këtë raport?
Ideja është për të kuptuar cila ka qenë ekspertiza e Ministrisë së Jashtme, që ka nxjerrë disa konkluzione për këtë vlerësim, për disa çështje të kësaj kompanie. Kjo është më e rëndësishme. Pra, për mua, nuk kam asnjë emocion për marrëveshjen e 2009- s. Ajo nuk ekziston më. Nuk është më. Ajo ishte një marrëveshje politike që është realizuar në atë kohë, por nuk është e vlefshme as nga ana kushtetuese, as nga ana juridike sot.
Presidenca ka nisur procesin e përgatitjes së negociatave, edhe përpara se të kërkohej autorizimi nga ministri Bushati?
Po, ne kemi nisur një proces konsultimesh edhe më parë me ekspertë nga më të mirët, e të drejtës ndërkombëtare dhe kushtetuese. Të ekspertëve të fushës së detit, të marinës. Dëshirë jonë ka qenë dhe mbetet që kjo çështje të përmbyllet sa më parë. Të përmbyllej që dje, jo që sot. Por është mjaft e rëndësishme që kjo histori të mbyllet njëherë e përgjithmonë dhe që të mbyllet kërkon një vëmendje dhe përgjegjshmëri maksimale, sepse njëherë nuk u treguam në nivelin e duhur me palën tjetër për shkaqet tona... Cilat janë këto shkaqe? Mendoj që ato janë shkaqet që në disa elementë i ka përmbledhur vendimi i Gjykatës Kushtetuese, por dhe janë mungesë koordinimi ndërinstitucionale. Në qoftë se qeveria asaj kohe do kishte bashkëpunuar me Presidentin dhe me opozitën, edhe disa probleme që dolën më pas të aspektit formal Kushtetues mund të ishin shmangur. Edhe politizimi do ishte shmangur, kjo s’na e jep neve luksin që pas 10 vjetësh të krijojmë probleme. Qeveri– President apo opozitë- Parlament, sepse jemi një palë në raport me palën tjetër.
Ka pasur akuza të forca për individë të caktuar të grupit negociator. Në sitën e ekspertëve të Presidentit kanë kaluar dhe këta emra. Për njërin, Berisha dhe PD thonë që është spiun? A janë verifikuar emrat?
Është proces që ende s’ka përfunduar. Para se të vija, kishin ardhur disa zarfe, që nuk pata mundësi t’i hap. Është proces që po vazhdon. Ne do bazohemi te të dhënat e institucioneve. Si ishte takimi me Ramën në Presidencë? Ishte takim tepër bashkëpunues, sidomos për këtë çështje. Duket sikur posti i Presidentit ka një mallkim për t’u përplasur me kryeministrat. Topi është përplasur me kryeministrin, që e ka emëruar. Kemi rastet e Moisiut me Nanon, Topi me Berishën, Nishani me qeverinë e majtë?
Nuk mund të flas për marrëdhëniet e presidentëve të tjerë. Por unë kam pasur një bashkëpunim të shkëlqyer me zotin Mejdani dhe kam vajtur për t’i dhënë dorëheqjen, ai nuk pranonte dhe unë kam ikur pak me nxitim për ta bërë fakt të kryer. Unë mendoj që debate do të këtë, dallime dhe qëndrime do të ketë. Edhe presidentët e mëparshëm kanë qenë institucionalë dhe nuk mendoj që problemi i Shqipërisë ka qenë ndonjëherë Presidenti. Përveç rastit kur Presidenti ishte dhe Kryeministër ( qesh). Me zotin Rama dikur ju takoheshit çdo të mërkurë? Ishin raporte të tjera. Ky që realizuat tani, ishte takimi i dytë? Ne jemi takuar disa herë. Si janë marrëdhëniet mes jush dhe zotit Rama. A ka raport personal mes jush dhe zotit Rama?
Nuk jam në këtë detyrë për të dhënë llogari për marrëdhëniet e mia personale me cilindo, jam këtu për t’i shërbyer bashkëpunimit më të gjitha institucionet. Me qeverinë në mënyrë të padiskutueshme, por edhe më të tjerët në funksionim të shtetit dhe institucioneve. Këtë përpiqem ta bëj çdo ditë.
Për kreun e SHISH, është një çështje që qëndron pezull dhe ju nuk keni thënë as po, as jo. Pse po e vononi?
E rëndësishme është që SHISH përmbush detyrat e veta çdo ditë. Unë pres që SHISH të vazhdojë të forcojë luftën kundër krimit të organizuar. A kemi problem me krimin e organizuar, zoti President? Patjetër, kemi pasur dhe që kemi. Problemet janë serioze! Në cilat aspekte? Aspektet janë të qarta, ju duket pak droga?! A janë të mjaftueshme aksionet e qeverisë dhe Policisë. Kemi një kapje droge prej 613 kilogramësh kokainë, me një vlerë shumë të madhe?
Patjetër që aksioni është pozitiv, por edhe kuraja për të nisur ngarkesë të tillë drejt Shqipërisë është shqetësuese. Do të thotë që, luftë këtij fenomeni dhe kundër këtyre grupeve kriminale dhe që duket që janë forcuar ndjeshëm dhe ky është një shqetësim edhe i partnerëve tanë ndërkombëtarë. Mjafton të kujtojmë deklaratat e prokurorit të antimafias italiane para disa ditësh, i cili paralajmëronte rreziqe serioze, që vinin nga trafikantët shqiptarë dhe bashkëpunimi midis tyre me trafikantët e Italisë për kanabisin, kryesisht dhe rrezikun që kjo infrastrukturë kriminale më pas përdoret dhe për droga të forta, por edhe për ata elementë akoma më problematikë, që kanë të bëjmë me sigurinë tonë kombëtare. Kur përbëjnë një shqetësim për Italinë që është vend i madh dhe që ka struktura mjaft solide, kuptohet në një vend modest jemi më të ekspozuar ndaj rrezikut të fuqizimit të këtyre grupeve.
Një qartësi për kreun e SHISH, ndoshta do të ndihmonte në këtë aspekt, sepse duket sikur jemi vend vulnerabil?
Nuk besoj se kjo ka penguar për të arritur rezultate më domethënëse në goditjen dhe parandalimin e këtyre grupeve kriminale. Mbetet shumë për të bërë nga SHISH. Ka bërë më shumë në të kaluarën në raport me institucionet e tjera, kanë qenë padyshim më aktivë gjatë kohës së drejtimit të zotit Visho Ajazit. Këtu kam parasysh raportet me Policinë e Shtetit dhe në raport me Prokurorinë, por mbetet ende për të vlerësuar vendosmërinë për të forcuar më tej këtë institucion me ketë prioritet dhe për të garantuar pavarësinë e tij në të ardhmen.
Pra, keni dilema që ky institucion mund të kryejë funksionin e tij në mënyrë të pavarur? Sigurisht, duhet të kem besim për të ndërmarrë një veprim. Pra, hezitimi juaj lidhet me pavarësinë e këtij institucioni? Pa asnjë diskutim, sepse vetëm një institucion i pavarur mund të jetë garant i atyre interesave që lidhen me sigurinë kombëtare.