New York Times: Opozita shqiptare mohon lidhjet me lobistët rusë për zgjedhjet
Shkrimi i prestigjiozes amerikane për akuzat e sponsorizimit të PD: Muzin u pagua 500 mijë dollarë për foton Basha– Trump
Partia Demokratike e Shqipërisë, grupi kryesor i opozitës, ka hedhur poshtë akuzat nga një artikull në SHBA i “Mother Jones”, se ata kanë marrë fonde sekrete nga burime ruse gjatë zgjedhjeve parlamentare të vitit të kaluar.
“Mother Jones” pretendon në një artikull të botuar të martën, se kompanitë e lidhura me Rusinë përdorën një lobist të SHBA- ve për të ndërhyrë fshehurazi në zgjedhjet e vitit 2017 në Shqipëri. Sipas artikullit, Nick Muzin, një ish- ndihmës i fushatës për Presidentin amerikan Donald Trump, u pagua nga “një kompani e paqartë skoceze e quajtur ‘ Biniatta Trade’, e cila u formua nga dy kompani ‘ guaskë’ me bazë në Belize... për punë në Shtetet e Bashkuara, për të ndihmuar Partinë Demokratike të Shqipërisë”. “Me sa duket, entitete të lidhura me Rusinë ndërhynë fshehurazi në Shtetet e Bashkuara në mënyrë që të ndërhynin në zgjedhje në Shqipëri”, thuhet në historinë e “Mother Jones”. Të mërkurën, demokratët konservatorë i hodhën poshtë akuzat, duke akuzuar Kryeministrin Edi Rama, të Partisë Socialiste të majtë, për financimin e një “historie qesharake... me fakte të rreme”. “Historia është produkt i një fushate të gjerë të ndërmarrë nga Edi Rama, i cili financohet nga burime ilegale që vijnë nga bota e krimit dhe korrupsionit”, thanë demokratët në një deklaratë. Demokratët, të cilët pësuan një humbje të madhe në zgjedhjet e qershorit, nënshkruan një kontratë me lobistin amerikan, Nick Muzin, i financuar nga një kompani e lidhur me Rusinë, për të mundësuar një takim të kreut të partisë, Lulzim Basha, me Trump dhe katër senatorë republikanë, në mënyrë që ai të bënte zhurmë me këtë mbështetje në Shqipëri përpara zgjedhjeve. Ditët para zgjedhjeve në Shqipëri, Muzin organizoi një vend VIP prej 20,000 dollarësh ( 16,000 euro) për Bashën në një takim mbledhjeje fondesh në Milwaukee dhe një fotografi me Trump. Muzin gjithashtu tha se demokratët e Shqipërisë e kishin paguar 500,000 dollarë ( 402,670 €), nëpërmjet ‘ Biniatta Trade’, “vetëm disa ditë para se ai të mundësonte fotografinë e rëndësishme të Bashës me Trump”. Partia opozitare, megjithatë, këmbënguli se ajo “nuk ka pasur dhe as nuk ka ndonjë lidhje të drejtpërdrejtë ose të tërthortë me individë apo kompani ruse”. Ambasada ruse në Tiranë tha se historia e “Mother Jones” ishte “tërësisht krijim absurd” dhe pjesë e një “fushate të pistë mediatike” kundër vendit nga Perëndimi. “Qëllimi është i qartë, për të imponuar një perceptim të shtrembëruar të vendit tonë dhe për të minuar zhvillimet e mëtejshme pozitive në bashkëpunimin midis Rusisë dhe Shqipërisë”, tha ambasada në një deklaratë.
Marrë nga “New York Times”