Martesat Gay, dy shoqata ankohen në Strasburg: Ndryshoni Kodin e Familjes
Raporti kundër diskriminimit: LGBT nuk i pranojnë në punë, vetëm 58 të rinj të këtij komuniteti janë punësuar
Shoqatat e Komunitetit Gej, Lesbike, Biseksuale, Trasgjender dhe Interseks, kërkojnë ndryshimin e Kodit të Familjes dhe lejimin e bashkëjetesës për çiftet e të njëjtit seks.
Në raportin e Komisionerit për Mbrojtjen nga Diskriminimi të depozituar në Parlament për vitin 2017, theksohet fakti se dy shoqata pro LGBT në Shqipëri kanë ankimuar në Gjykatën Europiane të të Drejtave të Njeriut në Strasburg diskriminimin që i bëhet nga Kodi i Familjes në Shqipëri. Në raportin e firmosur nga Irma Bajraku thuhet se: “Lidhur me të drejtat e LGBTI- së, 63% e të anketuarve mendojnë se nuk duhet të lejohen të bashkëjetojnë ( me 54% plotësisht jo dakord), 69% mendojnë se nuk duhet të lejohen të martohen ( 59% plotësisht jo dakord) dhe 75% mendojnë se nuk duhet të lejohen të kenë fëmijë ( 66% plotësisht jo dakord). Përsa i përket të drejtave të Lesbikeve, Gej, Biseksual, Transgjender dhe Interseks, në shkurt, dy OJQ- të paraqitën një ankesë në Gjykatën Evropiane të të Drejtave të Njeriut, duke kërkuar ndryshimin e Kodit të Familjes, i cili ndalon të drejtën e bashkëjetesës për çiftet e të njëjtit seks”. Ndërkohë që, lidhur me punësimin e këtij komuniteti, Komisionerja për Mbrojtjen nga Diskriminimi thekson se kompanitë shqiptare refuzojnë të pranojnë individë të këtij komuniteti në punë. Madje, punëkërkuesit janë treguar jo miqësorë ndaj këtij komuniteti, por gjithsesi në gjithë Shqipërinë janë punësuar në total 58 persona të komunitetit LGBT. “Sipas një studimi të realizuar nga “Head Hunter Albania” në 2017, raportohet një përqindje shumë e ulët lidhur me punësimin e personave LGBTI. Vetëm 4 % e kompanive kanë në politikat e tyre punësimin e komuni- tetit LGBTI dhe 6 % e tyre, në intervistat e tyre ndaj këtyre punëkërkuesve, janë miqësorë. Sipas këtij studimi, punësimi i këtyre të rinjve ( 58 persona), ka sjellë ndryshime pozitive në jetën e tyre”, thekson raporti i depozituar në Kuvend.
INVALIDËT Një tjetër shtresë, e cila, sipas raportit, është diskriminuar gjatë vitit 2017 është ajo e personave me aftësi të kufizuara. Në raport thuhet se institucionet shtetërore dhe kompanitë private, edhe pse kanë detyrim ligjor që të punësojnë të paktën 1 punonjës të këtij komuniteti në 24 vende pune, nuk e zbatojnë këtë detyrim ligjor. Në të gjithë Shqipërinë rezultojnë të jenë rreth 73 mijë invalidë pune. “Sipas të dhënave të ofruara nga Shoqata e Invalidëve të Punës, sot në Shqipëri ka 73 000 invalidë pune, nga të cilët 40.000 invalidë të plotë, 29600 invalidë të pjesshëm dhe 3400 invalidë të ish- kooperativave bujqësore. Në takimet me grupet e PAK, theksohet si mjaft shqetësues fakti i moszbatimit të kuotës së punësimit, sipas të cilit ‘ Çdo punëdhënës që punëson me tepër se 24 punonjës, është i detyruar të punësojë një person me aftësi të kufizuar për çdo 25 punonjës të personelit të tij’”, thekson raporti i Komisionerit.