“Shqipëria, paketa të përbashkëta rajonale turistike për tregjet e treta”
Shqipëria do të bëhet bashkë me vendet e rajonit, duke ofruar paketa të përbashkëta rajonale turistike për tregjet e treta, siç mund të jenë ato amerikane apo aziatike. Kjo është risia e prezantuar nga ministri i Turizmit dhe Mjedisit, Blendi Klosi gjatë Panairit Ndërkombëtar “I. T. B Berlin Fair”, që po mbahet këto ditë në Gjermani. I ftuar në Konferencën Ministeriale të Turizmit, ku ishte zgjedhur për të folur mbi zhvillimin e turizmit si përfaqësues i Ballkanit, Klosi theksoi se tregu shqiptar është një treg i rëndësishëm, por duhet të jetë në bashkërendim me partnerët lokalë për të hartuar paketa të përbashkëta rajonale. “Për të bërë të mundur këtë, ne kemi pasur takime me ministra, institucione përgjegjës të politikave të turizmit në rajon dhe politika jonë e përbashkët për të krijuar paketa të përbashkëta, me partnerët serbë, malazezë, të Kosovës dhe të Maqedonisë dhe për të pasur mundësi pastaj që këto politi- ka të përbashkëta shtetërore të konvertohen në politika biznesi të përbashkëta të tour operatorëve, është një nga risitë e këtij panairi. Ne po përpiqemi që të ftojmë sa më shumë tour operatorë rajonalë në këtë bashkërendim, për të pasur mundësi që për tregun e madh aziatik, amerikan, pra për tregun e madh përtej oqeanit, ne të kemi mundësi që të afrojmë një rajon si një paketë e përbashkët turistike”, vuri në dukje ministri Klosi. Në takimet e zhvil- luara me investitorë të rëndësishëm, Klosi mori garancinë se Shqipëria është në fokusin e tyre të interesit për të investuar në hotele dhe resorte me 4 dhe 5 yje. Kapacitetet e hotelerisë, shtoi Klosi, vijojnë të jenë të cunguara duke mos iu përgjigjur nevojave të tregut. Shqipëria përfaqësohet me stendën e saj me një prani të gjerë tour operatorësh nga vendi. Panairi Ndërkombëtar i ITB- së së Berlinit, është panairi më i madh i turizmit në Europë dhe një ndër më të mëdhenjtë në botë. Ky panair vizitohet nga 180 mijë vizitorë biznesi nga afro 200 vende të botës.