Kosova refuzon ofertën rumune

Kosova ka refuzuar kërkesën e çuditshme të Presidentit të Rumanisë, Klaus Iohannis, një vend që nuk e ka njohur pavarësinë e saj, për të ndërmjetësuar zgjidhjen mes saj dhe Serbisë. Iohannis ka deklaruar në Bukuresht, pas takimit me Presidentin e Serbisë, Aleksandar Vuçiç, se është i gatshëm të përfshihet në bisedime për gjetjen e një zgjidhjeje ndërmjet Kosovës dhe Serbisë. Ai ka thënë se zgjidhja përfundimtare nuk mund të imponohet nga jashtë dhe se ai nuk mund ta imagjinojë një zgjidhje që nuk e pranojnë serbët. Me imponim nga jashtë me siguri Presidenti rumun i referohej ndërmjetësimit të BE- së, e cila është prej vitesh negociatore mes dy vendeve ballkanike. Por nuk ka llogaritur që edhe vetë propozimi i tij është një ndërhyrje nga jashtë. Iohannis ka ofruar gatishmërinë e vendit të tij që gjatë pjesës së parë të vitit 2019, Bukureshti të marrë një rol në zgjidhjen e çështjes mes Kosovës dhe Serbisë. Rumania është një nga 5 shtetet e BE- së, që nuk e ka njohur pavarësinë e Kosovës. Bekim Çollakun, shefi i Kabinetit të Presidentit të Kosovës, Hashim Thaçi, tha për “Express”, se Rumania së pari duhet ta njohë pavarësinë e Kosovës e më pas të flasë nëse mundet për ndërmjetësim. Çollaku kujtoi se Bashkimi Europian është duke ndërmjetësuar bisedime dhe se pala kosovare nuk po kërkon që të zëvendësohet Brukseli. “Bashkimi Europian është dhe mbetet ndërmjetës/ lehtësues zyrtar i procesit të dialogut për normalizimin e marrëdhënieve ndërmjet Kosovës dhe Serbisë. Ne jemi mirënjohës dhe nuk jemi duke kërkuar zëvendësim për rolin vendimtar të BE- se si ndërmjetësues në këtë proces”, theksoi Çollaku duke shtuar se “për të fituar kredibilitet, rumunët duhet ta njohin pavarësinë e Kosovës”.