Ndikimi rus, Rama i bën gjyqin Bashës: Vepër penale, shko rrëfehu në Prokurori!
BASHA: RREZIKU RUS VJEN NGA RAMA, ME KOMPANITE E NAFTES
Kryetari i opozitës u është përgjigjur akuzave të Kryeministrit Rama për financimet e dyshimta nga Rusia.
Basha tha dje se akuzat e Edi Ramës janë qesharake dhe se Partia Demokratike nuk ka shkelur asnjë ligj dhe s'ka lidhje me individë apo kompani ruse. "Akuza që Partia Demokratike ka marrë para prej rusëve për të bërë konspiracion së bashku me Presidentin Trump kundër Edi Ramës është një akuzë qesharake, që vetëm një mendje megalomane si Edi Rama mund ta gatuajë. Këto akuza janë në vazhdën e qëndrimeve antiTrump dhe anti- administratës Trump nga Edi Rama. Partia Demokratike nuk ka shkelur asnjë ligj dhe nuk ka asnjë lidhje direkte dhe indirekte me asnjë individ, organizatë, kompani apo interes rus", ka thënë dje Basha.
KUNDËR AKUZA
Por dje, kryetari i demokratëve i ka bërë thirrje kreut të qeverisë të sqarojë lidhjet me një kompani ruse e quajtur "Gunvor", me eksponentët e së cilës ka zhvilluar takime në zyrën e tij. "Dje e akuzova publikisht Edi Ramën për lidhje të errëta me kompaninë ruse "Gunvor", por ai sot nuk u përgjigj, duke gatuar një tjetër sallatë ruse si ajo e "Mother Jones", për të fshehur të vërtetat. Nëse ka rrezik rus në Shqipëri, ai vjen përmes Ramës kryeministër! Jo vetëm sepse si njeri i zhytur në krim, ai është lehtësisht i shantazhueshëm nga kushdo, por sepse ai, konkretisht, ka mirëpritur ndikimin rus!. Edi Rama duhet të sqarojë publikisht se kush ia solli, çfarë ka biseduar dhe çfarë i ka premtuar kompanisë "Gunvor", me të cilën është takuar të paktën një herë në zyrën e tij në Tiranë", theksoi kreu i demokratëve. Për Bashën, Edi Rama duhet të sqarojë pse përkrah tezat e Rusisë për shkëmbimin e territoreve mes Shqipërisë dhe Serbisë. "Ai duhet të sqarojë, gjithashtu , se pse mbështet tezën e përkrahur edhe nga Rusia për shkëmbim territori midis Shqipërisë dhe Serbisë. Rama duhet të sqarojë gjithashtu aferën me kompaninë turke, që do të ndërtojë aeroportin e Vlorës, kompani e cila ka kontratë me kompani shtetërore ruse për ndërtim centralesh bërthamore", tha ai.
HETIMI
Për akuzat e ngritura, Basha tha dje se është i hapur që Prokuroria të nisë çfarëdolloj hetimi për demokratët. Por në të njëjtën kohë kërkoi që organi akuzës të verifikojë dhe mënyrën se si Edi Rama financoi takimin me Barak Obamën vite më parë. "Për kontratat e lobimit të Partisë Demokratike, ne i kemi kërkuar Prokurorisë shqiptare të kryejë çdo verifikim dhe i kemi dhënë Prokurorisë të gjitha dokumentet. Për të ruajtur të njëjtin standard dhe për t'i shërbyer drejtësisë, ftoj publikisht Prokurorinë shqiptare të fillojë hetimin e burimit dhe mënyrës si Edi Rama, në konspiracion me të tjerë, shkeli ligjet amerikane duke futur para të huaj në fushatën presidenciale Obama. Për këtë çështje ka një vendim të formës së prerë të drejtësisë amerikane, që ka vërtetuar faktin dhe krimin, prandaj Prokuroria shqiptare e ka të lehtë ta hetojë këtë çështje", tha dje ai. Për Bashën qëllimi i vërtetë i sulmeve ndaj PD- së është heqja e vëmendjes dhe pushimi i hetimit për Saimir Tahirin dhe rasteve të drogës në Xibrakë dhe 613 kilogram kokainë, që u kapën në Maminas.