Arrestohet inspektori tatimor, i mori ryshfet tregtarit
Për mos ta ndëshkuar me gjobë, i kërkoi 20 mijë lekë
Një inspektor i Hetimit Tatimor është arrestuar nga oficerët e Antikorrupsionit të Policisë së Tiranës, pasi dyshohet se i ka marrë para një tregtari në Rrogozhinë.
Burime zyrtare të Policisë thanë dje se i arrestuari është 34- vjeçari Klodjan Pjeshka, banues në Tiranë. Ai është denoncuar nga tregtari 56vjeçar, me iniciale K. V., banues në Lushnjë, të cilit i kishte kërkuar 20 mijë lekë të rinj, në këmbim të mosndëshkimit me gjobë, pasi e kishte konstatuar në shkelje gjatë kontrollit në biznesin e tij. Burimet thanë se korrupsioni i kryer nga 34vjeçari është dokumentuar nga kartëmonedhat që i ka dhënë tregtari, pasi ai i kishte fotografuar më parë. Nëpërmjet verifikimit të numrave të serive të kartë- monedhave është provuar akuza e ngritur ndaj tij nga shtetasi me iniciale K. V., i cili e kishte raportuar ngjarjen në Polici. Burimet thanë se inspektori i Drejtorisë Rajonale të Hetimit Tatimor është arrestuar me akuzat e “korrupsionit pasiv të personave që ushtrojnë funksione publike” dhe “shpërdorimit të detyrës”.
ARRESTIMI Policia e Tiranës njoftoi dje se nga Seksioni për Hetimin e Korrupsionit është kryer arrestimi në flagrancë i shtetasit Klodjan Pjeshka, 34 vjeç, banues në Tiranë, me detyrë inspektor i Drejtorisë Rajonale të Hetimit Tatimor. Sipas burimeve zyrtare të Policisë, arrestimi i tij është kryer pasi ditën e enjte, rreth orës 14: 00, i ka marrë para në këmbim të “faljes” nga gjoba një tregtari. Ngjarja ka ndodhur në Rrogozhinë, ku inspektori ishte dërguar për verifikim bashkë me kolegët. Burimet thanë se Pjeshka, duke shpërdoruar detyrën, për mosndëshkimin me gjobë, dyshohet se i ka kërkuar 20 mijë lekë të rinj, shtetasit K. V., 56 vjeç, banues në Lushnjë. “Materialet procedurale i kaluan Prokurorisë pranë Gjykatës së Shkallës së Parë Tiranë, në ngarkim të shtetasit Klodjan Pjeshka, për veprat penale të “Korrupsionit pasiv të personave që ushtrojnë funksione publike” dhe “Shpërdorimit të detyrës”, parashikuar nga nenet 259 dhe 248 të Kodit Penal”, tha dje Policia e Tiranës.