U denoncua në Komisariatin Dixhital, i gjejnë 686 kg kanabis
KORÇE - Një sasi e konsiderueshme lënde narkotike është kapur në fshatin Bulgarec, pak kilometra në distancë nga qyteti i Korçës. Bëhet fjalë për një sasi prej 686 kg e llojit kanabis sativa. Lënda narkotike u zbulua teksa ishte magazinuar në ambientet e shtëpisë së njërit prej banorëve të fshatit. Verifikimet e Policisë identifikuan pronarin e banesës, i cili rezultoi të jetë 45- vjeçari Jetnor Gugo nga fshati Bulgarec. Policia bëri me dije zyrtarisht se droga u zbulua pas një informacioni të dërguar në portalin Komisariati Dixhital. Edhe pse aspak e dyshimtë si banesë pasi ishte tepër e amortizuar dhe më tepër të linte përshtypjen e një ndërtese të braktisur, brenda saj ndodhej një sasi e konsiderueshme lënde narkotike që po thahej dhe më pas do të përpunohej. Sa- sia e konsiderueshme e drogës ishte në njërën prej dhomave të banesës ku jetonte 45- vjeçari. Ndërkohë, burime nga grupi hetimor bënë me dije se në shtëpinë e 45- vjeçarit Jetnor Gugo u gjetën 49 thasë të mbushur me bimë kanabisi. Bimët ishin të thata dhe boçet nuk ishin ndarë nga degët. Lënda narkotike dyshohet se ishte magazinuar në shtëpinë e 45vjeçarit për t’u tharë, ndërsa mendohet se ajo është kultivuar disa muaj më parë brenda në territorin e Qarkut të Korçës. Nga ana tjetër, droga mendohet se kishte destinacion Greqinë, edhe për shkak të distancës së afërt mes Korçës dhe vendit fqinj. Menjëherë pasi ka sekuestruar lëndën narkotike, Policia ka shpallur në kërkim 45vjeçarin, i cili rezulton se je- tonte i vetëm pas vdekjes së prindërve, ndërkohë që prej disa vitesh edhe ishte divorcuar nga bashkëshortja. Mësohet se në momentin e ndërhyrjes së forcave të Policisë për të ushtruar kontroll në banesën e tij, 45- vjeçari ndodhej në një prej lokaleve në fshat. Pasi ka mësuar për praninë e Policisë në shtëpinë e tij, Jetnor Gugo është arratisur për t’i shpëtuar prangosjes. dh. ç