Goditi me qytën e armës fqinjin, arrestohet i riu
LEZHE – Kërcënon me armë bashkëfshatarin dhe qëllon në ajër, arrestohet 29- vjeçari. Një konflikti i armatosur që mund të kishte përfunduar në tragjedi, është parandaluar mbrëmjen e së martës. Ngjarja ka ndodhur në fshatin Simor të Mirditës dhe kishte për autor Gjovalin Ndojin. 29- vjeçari ka ndërmarrë një veprim të tillë pasi kishte një konflikt me bashkëfshatarin e tij A. Ç, 38 vjeç. E gjithë historia ka nisur për shkak të bagëtive të 38- vjeçarit, pasi autori i arrestuar nga Policia i ka kërkuar llogari përse ato kanë kullotur në tokën e tij. Gjovalin Ndoji ka marrë një armë kallashnikov dhe ka shkuar në banesën e 38- vjeçarit. Pas një debati verbal, Ndoji e ka goditur dy herë me qytën e armës dhe më pas ka shtënë dhe në ajër. Mësohet se nga goditjet, shtetasi A. Ç., ka pësuar dëmtime të lehta dhe u dërgua për të marrë ndihmë mjekësore në Spitalin e Rrëshenit, nga ku mësohet se ndodhet jashtë rrezikut për jetën. Pak pas ngjarjes së rëndë, Policia mundi të vërë në pranga autorin, Gjovalin Ndojin, ndërsa në vendngjarje janë gjetur dhe sekuestruar në cilësinë e provës materiale dy gëzhoja automatiku. Në momentin e arrestimit në banesën e tij, 29- vjeçari Ndoji nuk ka bërë rezistencë, ndërkohë që gjatë marrjes në pyetje në komisariat, ka deklaruar para oficerëve të Policisë se gjithçka kishte ndodhur në gjaknxehtësi e sipër dhe nuk ka pasur për qëllim që ta lëndojë, por vetëm ta paralajmëronte për bagëtitë. 29- vjeçari nga fshati Simon do të dalë para drejtësisë me akuzën “Prodhimi dhe mbajtja pa leje e armëve luftarake dhe municionit”, “Plagosje e lehtë me dashje” dhe “Kanosja” dhe çështja i ka kaluar Prokurorisë, pranë Gjykatës së Shkallës së Parë Lezhë për hetim të mëtejshëm. “Gjovalin Ndoji, për motive banale është konfliktuar me shtetasin A. Ç., 38 vjeç, banues në Simon, Kaçinar- Mirditë, duke e goditur më qytën e automatikut në kokë dhe më pas dyshohet se ka qëlluar me armë në ajër për ta kërcënuar”, bëhet e ditur nga Policia lidhur me ngjarjen. e. h