Zbulohet skema e aferës së tokave në bregdet, si u falsifikuan tapitë
DOKUMENTI PER FRROKAJN. BASHA: SHPRESOJ TE JETE I PAFAJSHEM
Kryetari i Partisë Demokratike kërkoi që ndaj kryebashkiakut demokrat të Lezhës, Fran Frrokaj, të ketë një hetim të paanshëm dhe jopolitik.
Në një qëndrim zyrtar pas arrestimit të kryetarit të Bashkisë Lezhë, kreu i opozitës theksoi se të gjithë shpresojnë në pafajësinë e Fran Frrokaj. “Sot dua t’u them të gjithë shqiptarëve se ne shpresojmë dhe urojmë që Fran Frrokaj të jetë i pafajshëm. Qëndrimi im dhe i Partisë Demokratike është i pandryshuar, të gjithë duhet të jenë të barabartë para ligjit, nga qytetarët e thjeshtë, te politikanët më të lartë. Por ne kërkojmë që hetimi të jetë transparent, të jetë jopolitik dhe i paanshëm. Shqiptarët meritojnë një drejtësi të pastër dhe profesionale dhe jo një drejtësi të kapur dhe të ndikuar nga axhenda politike për drejtësi selektive të drejtuar ndaj një krahu politik në favor të një krahu tjetër”, deklaroi kreu i PD.
PROTESTA Përfaqësues të strukturave të Partisë Demokratike në Lezhë, por edhe qytetarë kanë protestuar para ambienteve të Komisariatit të Lezhës, duke kundërshtuar arrestimin e kryebashkiakut Fran Frrokaj. Protestuesit kanë bllokuar hyrjen e Komisariatit paraditen e së shtunës, në shenjë proteste ndaj arrestimeve të zyrtarëve të Bashkisë, duke i konsideruar këto veprime si krejtësisht politike. Protestuesit dhe përfaqësuesit e PD- së në Lezhë kanë kërkuar që të arrestohet më parë kryebashkiaku i Durrësit, Vangjush Dako, dhe të tjerë përfaqësues të Rilindjes që janë të korruptuar. Lëvizja përgjatë segmentit rrugor “Luigj Gurakuqi”, ku edhe ndodhet Komisariati i Lezhës për disa orë u bllokua plotësisht nga qytetarët e Lezhës, të cilët kanë lëshuar edhe akuza kundër kreut të qeverisë, i cili sipas tyre ka iniciuar të gjithë këtë skenar. Sipas protestuesve, ky sulm vjen disa muaj para zgjedhejve lokale për t’i dhënë avantazhe të mundshme kandidatit të së majtës për Bashkinë e Lezhës.
TAKIMI Në përfundim të protestës përpara Komisariatit të Lezhës, në selinë e PD- së në Lezhë ka qenë edhe kreu i PDsë, Lulzim Basha. Kreu i PD ka zhvilluar një mbledhje urgjente me strukturat e PDsë në Lezhë, një ditë përpara se Gjykata të japë masat e arrestit për kryebashkiakun Frrokaj dhe zyrtarët e tjerë. Në takim, Basha shoqërohej edhe nga nënkryetari i PD- së Edi Paloka dhe deputetët Flamur Noka dhe Aldo Bumçi. Sipas burimeve, nga takimi i zhvilluar me dyer të mbyllura, Basha ka deklaruar se demokratët presin një hetim të plotë të ngjarjes dhe se besojnë te pafajësia e kryebashkiakut Fran Frrokaj.