Habit Balla i PS- së, i kërkon demokratëve “të ndëshkojnë moralisht Lulzim Bashën”
Sekretari i Përgjithshëm i PS- së, Taulant Balla, i ka bërë dje thirrje sërish kryetarit të opozitës, Lulzim Basha, të japë shpjegime mbi origjinën e parave të cilat i ka përdorur për lobing në SHBA. Në një dalje për mediat, kreu i Grupit të PS- së, tha dje se ketë shqetësim e kanë ngritur dhe shumë zëra brenda Partisë Demokratike, ndaj Basha duket të përgjigjet për fshehjen e këtij financimi. “Burimet e errëta të këtij financimi, ku përfshihen edhe xhepa oligarkësh rusë, janë një arsye e pashmangshme që Lulzim Basha të ndiqet penalisht dhe kjo Parti Demokratike e marrë peng prej tij të ndëshkohet moralisht nga çdo demokrat i ndershëm”. Sipas tij, vetëm Lulzim Bashës i ndodh që një biznesmen rus i paguan 150 mijë dollarë dhe “tavarish” Luli vetë nuk di gjë. “Shqiptarët duan të dinë të vërtetën. Edhe brenda Partisë Demokratike janë të shumtë zërat publikë tashmë, që kërkojnë të dinë të vërtetën. Ne duam të dimë si e ka financuar Lulzim Basha fushatën e shpifjeve dhe të nxirjes së imazhit të Shqipërisë në institucionet dhe median amerikane. Është një dëm i madh që i është bërë Shqipërisë dhe shqiptarëve, por sot është momenti që Lulzim Basha të tregojë nga i ka gjetur paratë për të paguar lobimin në Amerikë dhe cilat janë lidhjet e tij me kompanitë ruse”, tha dje Balla. Ai ka hedhur dyshimin se paratë e përdorura nga PD janë pjesë e një skemë të pastrimit të parave. “A shërbejnë këto kompani vetëm si lavatriçe për të pastruar para, apo janë burim i drejtpërdrejtë financimi për fushatën e Lulzim Bashës? Sa kohë në kontratën e deklaruar nga vetë lobisti në Departamentin Amerikan të Drejtësisë është firma dhe numri i pasaportës së Lulzim Bashës, i takon Prokurorisë ta thërrasë një orë e më parë Lulzim Bashën për të dhënë shpjegimet e nevojshme si personi kryesor i dyshuar për një sërë veprash penale, e për ta zbardhur një orë e më parë këtë skandal tepër të rëndë”, tha dje kreu i Grupit të PS- së.