Moti i keq, vetrata e xhamit zë poshtë të moshuarin, vdes në spital
VLORE - Një 67- vjeçar ka mbetur viktimë e motit të keq, pasi një vetratë xhami i ra sipër nga era e fortë. Ngjarja ka ndodhur në lagjen “28 Nëntori” në Vlorë, ku 67vjeçari u godit nga vetrata e xhamit, e cila u shkëput nga një biznes në katin e dytë të një pallati buzë rrugës. Fillimisht, i moshuari Ramadan Kaci, si pasojë e shkëputjes së vetratës, mori dëmtime të rënda në kokë dhe trup. 67- vjeçari u dërgua me urgjencë në Spitalin Rajonal të qytetit të Vlorës për të marrë ndihmë mjekësore, por ndërroi jetë disa orë më pas. Për shkak të plagëve të rënda, pavarësisht ndërhyrjes së mjekëve, 67- vjeçari nuk arriti të mbijetojë. Nga rënia e vetratës së xhamit në rrugë, nuk pati persona të tjerë të lënduar, por vetëm dëme materiale. Policia ka nisur hetimet për zbardhjen e rrethanave të ngjarjes, që çuan në aksidentin me pasojë vdekjen e 67vjeçarit. Gjatë ditës së djeshme, qyteti i Vlorës është përfshirë nga një erë e fortë, ku dallgët në det shkonin deri në tetë ballë. Për pasojë, u pezullua krejtësisht lundrimi. Trageti i linjës Vlorë- Brindizi nuk ka kryer itinerarin e zakonshëm, duke qëndruar në det të hapur, pasi nuk mund të ankorohej dot në port për shkak të frikës nga përplasja me kalatën e portit, si pasojë e motit të keq. Po ashtu, edhe mjetet e tjera lundruese nuk kanë mundur të dalin në det si pasojë e motit, ndërsa normalizimi i situatës pritet të vijë vetëm gjatë ditës së diel. Probleme për shkak të motit ka pasur në qytet, ku janë rrëzuar disa palma.