Në Amerikë dhe Kanada për 25 mijë USD, kush janë 39 të arrestuarit që kaluan 1 mijë klandestinë
OPERACIONI I POLICISE NE BASHKEPUNIM ME SHBA. PJESE E 7 BANDAVE EDHE KATER POLICE. LINJAT E UDHETIMIT
Për të mbërritur në destinacionin përfundimtar, shqiptarët që paguanin paratë tek anëtarët e 7 grupeve kriminale, ndiqnin 4 linja. Udhëtimi që niste me qëllime turistike ishte i rregullt deri në vendet e Bashkimit Europian, më pas pajiseshin me dokumente të falsifikuara për të vazhduar më tej, në Amerikë, Kanada dhe Britaninë e Madhe.
Itineraret e ndjekura prej tyre ishin: Shqipëri – Itali - Mbretëri e Bashkuar, Shqipëri – Francë - Mbretëri e Bashkuar, Shqipëri – Bullgari – Belgjikë - Republikë Domenikane – SHBA - Kanada dhe Shqipëri – Spanjë - Amerikë Latine – SHBA - Kanada. Hetimi i nisur në vitin 2017 është iniciuar nga agjencitë amerikane, ndërkohë që më tej çdo veprim tjetër është gjurmuar nga prokurori i kësaj dosjeje, Eugen Beçi, si dhe nga Policia e Shtetit. Përmes falsifikimit, rrjeti i trafikantëve ndërkombëtarë që në përbërje ka shtetas shqiptarë dhe të huaj, ka trafikuar mbi një mijë shtetas. Një pjesë e emigrantëve të paligjshëm ka dyshime se nuk kanë mbërritur në destinacionin për të cilin kanë paguar, por janë braktisur nga trafikantët në vendet e Amerikës Latine. Hetimi ka zbuluar se trafikantët shfrytëzonin disa agjenci në Tiranë dhe Lezhë për prerjen e biletave të udhëtimit për qëllime turistike dhe më tej sapo mbërrinin në vendet e Bashkimit Europian, qytetarëve të interesuar për të emigruar në Amerikë, Kanada dhe Angli u jepeshin dokumente të tjera të falsifikuara së bashku me një biletë të re.
PAGESAT Ka dyshime se për të emigruar në këtë mënyrë të paligjshme secili prej qytetarëve të interesuar ka paguar një faturë prej 25 mijë deri në 30 mijë dollarë. Menjëherë pasi Gjykata e Krimeve të Rënda ka vendosur masat e arrestit në mungesë, forcat operacionale kanë nisur aksionin në të gjithë vendin për kapjen e të kërkuarve. Operacioni është zhvilluar në disa qytete, kryesisht në Lezhë, Shkodër, Tiranë, Dibër, Kukës dhe Korçë, gjatë të cilit janë arrestuar 39 persona dhe katër efektivë të Policisë Kufitare që nuk kanë regjistruar qytetarët që po dilnin jashtë vendit. “Për çdo person paguhej nga 7 mijë paund për në Angli dhe 25- 30 mijë dollarë për në SHBA dhe Kanada”, tha dje drejtori i Përgjithshëm i Policisë, Ardi Veliu. Materialet hetimore në lidhje me ndalimin e këtyre personave dhe provat materiale të sekuestruara, janë vënë në dispozicion të Prokurorisë pranë Gjykatës së Shkallës së Parë për Krimet e Rënda. Hetimet për këtë procedim penal vijojnë në lidhje me persona të tjerë të përfshirë në këtë aktivitet kriminal. “Finalizimi i këtij superoperacioni dëshmon rritjen e besueshmërisë të Policisë shqiptare, Prokurorisë dhe agjencive të tjera ligjzbatuese te partnerët ndërkombëtarë. Duke përfituar nga rasti, falënderojmë partnerët për mbështetjen dhe besimin. Policia e Shtetit është e gatshme dhe e angazhuar të godasë me Forcën e Ligjit çdo veprimtari antiligjore dhe veçanërisht krimin e organizuar, për të ndërtuar një Shqipëri më të sigurt e më të mirë”, u shpreh Ardi Veliu.