Katër policë në rrjetin e trafikantëve të klandestinëve
Mes 39 personave që u arrestuan dje gjatë operacionit të koduar “One If – By Land”, që merreshin me trafikimin e klandestinëve drejt Mbretërisë së Bashkuar, SHBA- së e Kanadasë, janë edhe 4 efektivë të Policisë së Shtetit. “Gjithashtu, janë arrestuar edhe 4 punonjës të Policisë së Shtetit, me detyrë kontrollorë në Pikat e Kalimit Kufitar, Hani i Hotit dhe Qafë Thanë, të cilët kanë shpërdoruar detyrën duke mos kryer regjistrimin e shtetasve të kontrabanduar në pikat e kalimit kufitar, në kundërshtim me ligjin”, tha dje drejtori i Përgjithshëm i Policisë, Ardi Veliu. Efektivët e arrestuar janë Çelnik Maksuti, 53 vjeç, Ilir Ismaili, 32 vjeç e Erjon Maxharu, 28 vjeç, të tre nga Pogradeci dhe me detyrë kontrollorë në Pikën e Kalimit Kufitar të Qafë Thanës, si dhe Gjokë Ujkaj, 46 vjeç, nga Shkodra me detyrë kontrollor në Pikën e kalimit Kufitar të Hanit të Hotit, Shkodër. Burime nga grupi hetimor thanë se këta punonjës policie, dyshohet të kenë bashkëpunuar me anëtarët e 7 grupeve kriminale, për të lejuar kalimin e paligjshëm të kufirit drejt Anglisë, SHBA- së dhe Kanadasë, të të paktën 1 mijë shtetasve shqiptarë. Mësohet se duke shpërdoruar detyrën, efektivët e Policisë Kufitare, nuk kanë regjistruar në kufi shtetasit që udhëtonin fillimisht drejt vendeve të Bashkimit Europian. Sipas burimeve nga grupi hetimor, ka rezultuar se 200 shtetas shqiptar kanë udhëtuar në mënyrë të jashtëligjshme drejt Britanisë së Madhe, ndërsa 800 të tjerë drejt Shteteve të Bashkuara të Amerikës dhe Kanadasë. Megjithatë, ende nuk dihet me saktësi se sa është numri i shtetasve shqiptarë që mund të kenë paguar para tek anëtarët e këtyre grupeve kriminale për të udhëtuar në këtë mënyrë.