Militantët e PD, në protestë për arrestimin e kryebashkiakut Frrokaj
LEZHE - Qindra mbështetës dhe përkrahës të kryebashkiakut të Lezhës, Fran Frrokaj, kanë protestuar para Komisariatit të Policisë në Lezhë për të protestuar kundër arrestimit të tij. Grumbullimi i protestuesve nisi rreth orës 09: 00 të mëngjesit të së dieles duke shkaktuar dhe probleme me qarkullimin e automjeteve. Pjesëmarrësit në protestë e konsiderojnë arrestimin e Frrokajt si sulm politik me qëllim dëmtimin e tij në prag të zgjedhjeve lokale që do të mbahen vitin e ardhshëm. Sipas tyre, abuzime me pronat ka pasur dhe në bashki të tjerë dhe deri tani nuk ka kryebashkikë socialistë të arrestuar. Protestuesit gjithashtu lëshuan thirrje për drejtësi të paanshme dhe objektive, duke kërkuar që të hetohen dhe zyrtarë të tjetër të lartë të qeverisë qendrore për korrupsion. Policia e Lezhës ka shoqëruar gjatë ditës së sotme disa persona, të cilët kanë protestuar përpara ambienteve të policisë, kundër arrestimit të kryebashkiakut Fran Frrokaj. Protestuesit janë mbajtur në komisarit duke ju thënë se tubimi është i paligjshme dhe nëse do ta vazhdojnë me protesta ata do të ndiqen penalisht. Pjesë e protestës ishte dhe kreu i degës së PD- së në Lezhë, Paulin Marku. Ky i fundit e cilësoi arrestimin e Frrokajt si sulm të pastër politik për dëmtimin e PD- së në zgjedhje. "Nuk jemi kundër drejtësisë, pasi ne jemi pro drejtësisë. PD ka shprehur hapur që këtij vëndi prej 27 vitesh i mungon drejtësia, por ne kërkojmë një drejtësi jo të njëanshme. Kërkojmë një drejtësi ku të gjithë përsonat që abuzojnë me ligjin apo abuzojnë ne çdo lloj drejtimi i cili është në kundërshtim me ligjin, të vihen para drejtësisë", tha Marku. Ai shtoi se, pavarësisht sulmit, PD do të dalë më e fortë në zgjedhjet e ardhshme lokale që do të mbahen vitin e ardhshëm. e. h