Putin fiton me lehtësi zgjedhjet presidenciale
Mori 73.9% të votave, votuan rreth 60% e 111 milionë njerëzve
Presidenti rus, Vladimir Putin, ka fituar me lehtësi një mandat të ri gjashtëvjeçar presidencial në zgjedhjet e së dielës, në një kohë kur lidhjet e tij me Perëndimin janë armiqësuar.
Fitorja e Putin e zgjat kohën e tij në detyrë deri në vitin 2024, kur ai do të jetë 71 vjeç. Putin ka premtuar të përdorë mandatin e tij të ri për të forcuar mbrojtjen e Rusisë kundër Perëndimit dhe për të rritur standardet e jetesës. Ai e ka dominuar jetën politike në Rusi për 18 vitet e fundit. Partia e tij ka marrë një vlerësim të miratimit me rreth 80 për qind dhe kjo e ka bërë të padiskutueshme fitoren e tij. Asnjë nga shtatë kandidatët që garuan kundër nuk ishin në të vërtetë një kërcënim për të dhe kreu i opozitës, Alexei Navalny, nuk u lejua të garojë. Kritikët thonë se zyrtarët i kishin detyruar njerëzit të shkonin në votime për të siguruar që të mos kishte një pjesëmarrje të ulët. Exit- pollet kanë treguar se Putin ka fituar 73.9 për qind të votave. Në projeksionin nga VTsIOM, sfiduesi nga Partia Komuniste, Pavel Grudinin, është në vendin e dytë me 11.2 për qind të votave. Vladimir Zhirinovsky, kreu i Partisë Liberal Demokrate, ka marrë 6.7 për qind të votave dhe personaliteti televiziv, Ksenia Sobchak, 2.5 për qind të votave. Në Rusi ka rreth 111 milionë njerëz me të drejtë vote. Komisioni Qendror i Zgjedhjeve në Rusi pranoi se ka pasur disa parregullsi, por pritet ta deklarojnë rezultatin legjitim.
PARREGULLSITË
Video të publikuara tregojnë shkeljet që janë bërë gjatë procesit të votimit në Rusi, ndërkohë që Presidenti Putin ka fituar mandatin e katërt për të drejtuar vendin. Në Moskë, në zonën Lyubertsy, fletë të shkruara votimi janë hedhur fshehurazi në kuti nga një zyrtar i komisionit të zgjedhjeve. Pamjet janë regjistruar nga kamerat e sigurisë CCTV. Në një tjetër video nga Dagestan, një burrë po mbush kutinë e votimit me fletë votimi të përfunduara, ndërsa një zyrtare zgjedhore femër qëndron roje. Kjo ndodhi kur qendra e votimit numër 380 ishte pa njerëz. Në një tjetër qendër votimi, një grup meshkujsh kanë krijuar rrëmujë për të bllokuar vëzhguesit, ndërsa një tjetër mbushte një kuti me fletëvotimi të shkruara.
DËSHTIMI I BOJKOTIT
Thirrja për të bojkotuar këto zgjedhje, e cila u bë nga lideri karizmatik i opozitës, Alexei Navalny, nuk u materializua, pasi, sipas të dhënave, pjesëmarrja në këto zgjedhje ka qenë rreth 60 për qind. Navalny ka shpallur më parë kandidaturën për të garuar, por nuk u lejua nga autoritetet pasi ai ka qenë më parë i dënuar, edhe pse për një dënim politik. Autoritetet kanë shpenzuar shumë para për të nxitur votuesit të marrin pjesë në këto zgjedhje për t’i siguruar Presidentit në mandat të katërt të fortë gjashtëvjeçar. Duke hedhur votën në Moskë, Putin tha se ai do ta konsideronte një sukses çdo përqindje votash. “Programi, që unë propozoj për vendin, është ai i duhuri”, tha ai.