Negociatat, Meta: Me Bushatin realizuam bashkëpunim pozitiv
“Kristafi? Personalitet në fushën e së Drejtës Ndërkombëtare. Propozim pozitiv”
Presidenti Ilir Meta ka folur dje për herë të parë pas vendimit të tij për t’i dhënë autorizimin ministrit të Jashtëm, Ditmir Bushati, për nisjen e negociatave për finalizimin e marrëveshjes së detit me Greqinë.
I pranishëm në simpoziumin e organizuar nga Kryegjyshata Botërore e Bektashinjve, Meta iu përgjigj interesit të gazetarëve për shtimin e një përfaqësuesi të ri në grupin e 12 negociatorëve të propozuar nga qeveria. Shtimin e emrit të profesor Ksenofon Kristafit, Ilir Meta e ka quajtur si një propozim shumë pozitiv. Ai tha se Kristafi është një personalitet në fushën e së Drejtës Ndërkombëtare. “Ka qenë një propozim shumë pozitiv dhe mjaft i mirëpritur edhe nga ana ime, për arsye se është një personalitet në fushën e së Drejtës Ndërkombëtare, por dhe me mjaft eksperiencë për raste te tilla”, ka thënë dje Meta. Duke folur për vendimin e tij për të lejuar nisjen e procesit të negociatave dhe heqjen e pikëpyetjeve rreth emrave të negociatorëve, kreu i shtetit tha dje se me Ministrinë e Jashtme është arritur një proces solid ligjor. “Besoj se tashmë kemi realizuar një bashkëpunim mjaft konstruktiv dhe të dobishëm për të pasur një proces solid nga pikëpamja kushtetuese, por edhe tekniko- ligjore për negociata sa më të suksesshme për një marrëveshje të drejtë me Greqinë”, tha dje kreu i shtetit. I pyetur nëse ministri Bushati i ka përmbushur të gjitha kërkesat e Presidentit, Meta tha: “Unë besoj se është bërë një punë mjaft e konsiderueshme dhe jemi në një proces tashmë, do të thosha, mjaft solid nga pikëpamja kushtetuese, por dhe tekniko- ligjore”.
VERIFIKIMI Pjesë e grupit negociator do të vazhdojë të qëndrojë eksperti i Detit, koloneli Artur Meçollari, për të cilin opozita ka ngritur akuza se është “spiun” i agjenturave të vendeve jo të NATO- s. Burimet pohuan se nga procesi i verifikimit dhe informacionet që u morën nga institucionet e inteligjencës së vendit, u arrit në konkluzionin se Artur Meçollari mund të vazhdojë të jetë pjesë e grupit negociator dhe se nuk ka prova për akuzat e ngritura nga politika ndaj tij. Kreu i shtetit, edhe pse ka pranuar të japë autorizimin për ministrin e Jashtëm, u ka bërë thirrje institucioneve vendase që të zbatojnë Kushtetutën e vendit. “Presidenti i Republikës, Sh. T. Z. Ilir Meta, i kërkon Ministrisë për Europën dhe Punët e Jashtme, institucioneve shtetërore shqiptare, të përfshira në këto negociata dhe grupit negociator, të përmbushin përgjegjësitë e tyre në respekt të Kushtetutës së Republikës së Shqipërisë, të Vendimit nr. 15, datë 15.04.2010 të Gjykatës Kushtetuese, akteve ndërkombëtare ku Republika e Shqipërisë është palë, kuadrit të brendshëm ligjor, në interes të ruajtjes dhe ushtrimit të sovranitetit territorial dhe juridiksionit kombëtar dhe të garantimit të sigurisë, dobisë ekonomike e sociale të vendit”, thekson njoftimi i Presidentit.