“Rama- Bushati i kanë falur Greqisë naftën”

Denoncimi i Berishës pas dhënies së autorizimit nga Meta

Ish- Kryeministri Sali Berisha akuzon Kryeministrin Rama dhe ministrin e Jashtëm Bushati, se pas marrjes së plotfuqishmërisë për të negociuar me Greqinë, do të falin fushat më të mëdha të gazit dhe naftës në Jon dhe Mesdhe. Përmes një reagimi për mediat, një ditë pasi kreu i shtetit i dha plotfuqishmërinë ministrit të Jashtëm, Berisha foli për plan të dyshes Rama- Bushati, në dëm të Shqipërisë. “Presidenti i Republikës Meta, pasi në një akt të pashembullt në historinë e marrëdhënieve ndërinstitucionale të shtetit shqiptar, u detyrua të kthejë dy herë për plotësime në përputhje me Kushtetutën kërkesën për të dhënë autorizimin për fillimin e negociatave për marrëveshjen e detit me Greqinë, autorizoi ministrin Bushati për nisjen e tyre. Presidenti, natyrisht, nuk mund të mos jepte atë autorizim pasi kërkoi plotësimin e kushteve që kërkon vendimi i Gjykatës Kushtetuese për dhënien e tij. Por cilido që ka ndjekur mediat shqiptare dhe greke, de- klaratat në këto media të Edi Ramës, Ditëzi Bushatit dhe homologëve grekë të tyre, e ka të qartë se Rama dhe Ditëziu i tij i fshehën Presidentit të Republikës dhe qytetarëve shqiptarë asgjë më tepër se sa marrëveshjen e tyre e arritur me palën greke, me të cilën, duke vendosur kryenegociator një spiun tashmë të provuar, i kanë falur Greqisë fushat më të mëdha të gazit dhe naftës në Jon dhe Mesdhe”, deklaroi Berisha. Ish- Kryeministri iu referua qëndrimeve të mbajtura në media nga Rama e Bushati, kur deklaroi se marrëveshja me Greqinë ka përfunduar përpara dhënies së plotfuqishmërisë nga Presidenti. “Rama dhe Ditëziu i tij, që kërkojnë tani autorizimin për negociatat e përfunduara, deklaruan se marrëveshja është arritur, të njëjtën gjë u pohuan edhe homologët e tyre greke parlamentarëve dhe mediave greke. U bëj thirrje qytetarëve shqiptarë, të ngrihen fuqishëm në mbrojtje të pasurive përrallore, integritetit territorial të kombit shqiptar dhe Shqipërisë”, deklaroi Berisha.