“Vetingu” referon në Prokurori ish- anëtarin e Gjykatës Kushtetuese

Procesi i vetingut u ndërpre fillimisht për gjyqtarin, pas dorëheqjes nga Kushtetuesja më 12 shkurt të këtij viti

Ish- gjyqtari i Gjykatës Kushtetuese, Besnik Imeraj, është dërguar për ndjekje penale në Prokurorinë e Përgjithshme nga Komisioni i Pavarur i Kualifikimit.

Lajmi u publikua nga vetë institucioni i vetingut, ditën e djeshme përmes një njoftimi të shkurtër në faqen e tij zyrtare. Besnik Imeraj dha dorëheqjen nga Gjykata Kushtetuese më 31 janar 2018 dhe procesi i vetingut ndaj tij u ndërpre. Por pavarësisht kësaj, duket se Komisioni i Pavarur i Kualifikimit ka gjetur shkelje që përbëjnë vepër penale dhe ka vendosur ta referojë dosjen e tij në Prokurorinë e Përgjithshme për hetime të mëtejshme. “Komisioni i Pavarur i Kualifikimit njofton se, në bazë të nenit 281 të Kodit të Procedurës Penale, ka referuar pranë Zyrës së Prokurores së Përgjithshme të gjithë dokumentacionin, që rezultoi nga hetimi administrativ gjatë procesit të rivlerësimit të ish- gjyqtarit të Gjykatës Kushtetuese, zotit Besnik Imeraj,” thuhet në njoftimin e sh- kurtër të KPK- së, të publikuar në faqen zyrtare të këtij institucioni. Ende nuk dihet se çfarë përmban dosja e KPK- së që i është referuar Prokurorisë së Përgjithshme për Besnik Imerajn. Ky i fundit ka qenë gjyqtar karriere dhe i emëruar së fundmi, në vitin 2013 nga ish- Presidenti Nishani si anëtar i Gjykatës Kushtetuese. Besnik Imeraj ka qenë edhe relator i ligjit të vetingut në Komisionin e Venecias. Ai ka gjykuar plot dosje të bujshme gjatë viteve që ka punuar në sistemin e drejtësisë si gjyqtar. Përmendim këtu çështjen e Aldo Bares dhe shumë të tjera. Në janar të këtij viti, Imeraj dha dorëheqjen nga Gjykata Kushtetuese, duke thënë se arsyet ishin personale. Mirëpo, sipas ligjit për Reformën në Drejtësi, gjyqtarëve dhe prokurorëve shqiptarë iu dha mundësia në fillim të Reformës në Drejtësi, që të tërhiqeshin pa hyrë automatikisht në kontroll për një periudhë tremujore. Sipas Aneksit G të Kushtetutës, gjyqtarët dhe prokurorët që tërhiqeshin në këtë mënyrë, nuk lejo- heshin të ktheheshin në sistemin e drejtësisë për 15 vjet. Dorëheqja e papritur e Imerajt nga Gjykata Kushtetuese ngjalli dyshime për pastërtinë e figurës së tij. Për Imerajn, PKP- ja vendosi pushimin e procesit të vetingut më datë 12 shkurt. Por vetëm një muaj më vonë, po ky institucion, vendosi ta referojë çështjen në Prokurorinë e Përgjithshme, e cila do të ketë për detyrë të shqyrtojë nëse nga ky hetim administrativ kanë dalë apo jo fakte që përbëjnë vepër penale.