LEZHE/ Breshëri nxjerr makinën nga rruga, tre të plagosur
LEZHE - Tre persona kanë mbetur të plagosur, njëri prej të cilëve në gjendje të rëndë, pasi automjeti me të cilin po udhëtonin doli nga rruga. Aksidenti ndodhi rreth orës 05: 00 të së martës në superstradën Lezhë- Laç, në afërsi të fshatit Ishull- Shëngjin. Automjeti tip “Mercedez Benz” me targë AA 025 MK ka qenë duke lëvizur në drejtim të qytetit të Lezhës, ku si pasojë e lagështisë në rrugë dhe shpejtësisë së madhe, drejtuesi i mjetit ka humbur kontrollin, duke dalë nga rruga dhe duke përfunduar në një fidanishte. Nga aksidenti kanë mbetur të plagosur drejtuesi i mjetit, shtetasi me iniciale T. P, 26 vjeç, si dhe pasagjerët, shtetasja S. G, 17 vjeçe dhe A. R, 23 vjeç. Ky i fundit ka marrë dëmtime më të shumta dhe është dërguar për ndihme mjekësore në Spitalin e Traumës në Tiranë, ndërsa dy të plagosurit e tjerë ndodhen në Spitalin Rajonal të Lezhës jashtë rrezikut për jetën. Në momentin e aksidentit, ka pasur edhe reshje breshëri, të cilat mendohet se janë bërë shkaku kryesor që mjeti, i cili po lëvizte me shpejtësi, të dilte nga rruga. e. h
PUKE/ Kreu i PD- së Fushë- Arrëz dorëhiqet nga Këshilli Bashkiak
Anëtari i vetëm i Këshillit në Bashkinë e Fushë- Arrëzit nga Partia Demokratike ka dhënë dorëheqjen. Prel Gjoni, në një letër dërguar Komisionit të Mandateve pranë Këshillit Bashkiak, deklaron dorëheqje të parevokueshme duke dhënë si arsye ngarkesën që ka për shkak të angazhimit partiak. Gjoni mban detyrën e kreut të PD- së në degën e Fushë- Arrëzit, ndërsa në zgjedhjet e pushtetit vendor ishte kryesues i listës së kandidateve të PD- së për Këshillin Bashkiak, ku PD fitoi vetëm një mandat. Në letrën e dorëheqjes, kreu i demokratëve të Pukës ka përmendur si motiv të largimit të tij ngarkesën që ka si pasojë e angazhimit politik. Gjoni ka marrë kritika për mënyrë e drejtimit të degës së PD- së, duke e cilësuar atë si person afër “pushtetit”. Gjithashtu, ankesat kanë të bëjnë dhe me faktin se ai jeton larg elektoratit lokal pasi banon në Tiranë. Sipas renditjes pasuese, pas Prel Gjonit në Këshillin Bashkiak të Fushë- Arrëzit është Greta Prendi, e cila si pasojë e angazhimeve personale jashtë vendit nuk e ka pranuar mandatin, që pritet t’i kalojë Hil Kola, ish- kryetar i komunës në Qafë- Mal.