Trump uron Putin për fitoren: Do të takohemi së shpejti
Presidenti Trump i ka telefonuar homologut të tij rus, Vladimir Putin, për fitoren dhe rizgjedhjen dhe tha se ka ndërmend të takohet me Putinin për të diskutuar tema të ndryshme, duke përfshirë një garë armësh që po del jashtë kontrollit. Telefonata u njoftua fillimisht nga Kremlini, por më pas u konfirmua nga Trump, në njoftimet e Shtëpisë së Bardhë. Duke folur me gazetarët në Zyrën Ovale, Trump tha se ai e përgëzoi Putinin mbi fitoren dhe se ai dhe Putin do të takoheshin në të ardhmen jo shumë të largët. “Donald Trump përgëzoi Vladimir Putinin për fitoren e tij në zgjedhjet presidenciale”, kështu njoftoi Kremlini. Dhe, përtej përgëzimeve, sipas njoftimit të dy udhëheqësit diskutuan Sirinë, Ukrainën, Korenë e Veriut dhe kontrollin e armëve. “Vëmendje e veçantë u kushtua për të bërë përparim në çështjen e mbajtjes së një takimi të mundshëm në nivelin më të lartë. Biseda bartte një karakter konstruktiv dhe ishte e orientuar drejt kapërcimit të problemeve që janë grumbulluar në marrëdhëniet SHBARusi”, u tha nga Presidenca ruse. Ndërsa Trump, mbi konfirmimin e bisedës, u tha gazetarëve: “Kam pasur një telefonatë me presidentin Putin dhe e kam uruar atë për fitoren, fitoren e tij elektorale. Telefonata duhej të bëhej gjithashtu për faktin se ne ndoshta do të takohemi në një të ardhme jo shumë të largët, në mënyrë që të mund të diskutojmë për armët, ne mund të diskutojmë garën e armëve. Siç e dini, ai bëri një deklaratë se të jesh në një garë armësh nuk është një gjë e mrekullueshme. Dhe ne po shpen- zojmë 700 miliardë dollarë këtë vit për ushtrinë tonë dhe shumë prej këtyre parave janë për të punuar që të mbetemi më të fortë se çdo komb tjetër në botë”. Sipas presidentit të SHBA- ve, telefonata ishte shumë pozitive dhe se “Ndosh- ta do të takohemi në të ardhmen jo shumë të largët për të diskutuar garën e armëve, e cila po del jashtë kontrollit, por kurrë nuk do të lejojmë askënd të ketë çdo gjë edhe afër asaj që kemi. Gjithashtu do të diskutojmë mbi Ukrainën, Sirinë dhe Korenë e Veriut, si dhe gjëra të tjera. Shtëpia e Bardhë tha se Trump dhe Putin kanë prekur marrëdhëniet dypalëshe dhe kanë vendosur të vazhdojnë dialogun për prioritetet dhe sfidat e ndërsjella të sigurisë kombëtare.