Bushati: Shpresojmë për një marrëveshje të drejtë me Greqinë
Ministri i Jashtëm, Ditmir Bushati, menjëherë pas mori autorizimin e Presidentit të Republikës për negociatat me Greqinë, është gati të japë plotfuqishmërinë për nisjen e këtyre negociatave. Në një intervistë për mediat nga Brukseli, Bushati theksoi se nuk do të humbë kohë dhe do të përpiqet që brenda pak ditësh të nisin negociatat teknike me palën greke. “Pa humbur kohë, do të procedojmë me plotfuqishmërinë. Shpresojmë shumë që për pak ditë apo javë, ne të bëjmë raundin e parë të diskutimeve teknike me palën greke, bazuar mbi një proces pune voluminoz dhe parapërgatitor, që ka ndodhur gjatë 4 viteve. Ne kemi pasur konsultime, ndërveprime me Presidentin e Republikës dhe institucionet e tjera për të gjitha çështjet që Presidenti ka shtruar. Tani ka një material shtesë dhe voluminoz edhe falë këtij ndërveprimi, që është një material orientues për grupin negociator”, tha Bushati. Kreu i diplomacisë shqiptare u shpreh i vendosur për arritjen e një marrëveshjeje sa më të drejtë për të mos përsëritur gabimet e vitit 2009. “Jemi shumë të vendosur për të shkuar drejt një marrëveshjeje sa më të drejtë, sa më të ndershme për të mos përsëritur asnjë nga gabimet e 2009- ës dhe natyrisht për të respektuar normat ndërkombëtare, të aplikueshme dhe detyrueshme për Shqipërinë dhe Greqinë, vendimmarrjen e gjykatës Kushtetuese, e cila ofron një blueprint për atë se çfarë nuk duhet të bëjmë duke pasur parasysh praktikën e hidhur të 2009- ës. Urojmë që të kemi një marrëveshje që të jetë e zbatueshme, sepse siç vërteton praktika, është e rëndësishme që përmes një procesi të ndershëm, të shkojmë drejt një marrëveshjeje që është e zbatueshme për të dyja palët, dhe të dyja palët duhet të dalin nga ky proces me ndjesinë që kanë negociuar një marrëveshje të drejtë për ta”, tha Bushati.